Kielsen: Inniminniilliornerit suulluunniit akuerineqarnatillu akuerineqanngisaannartussaapput
Siumumut Naalakkersuisullu Siulittaasuata Kim Kielsenip allakkatigut Sermitsiaq.AG-mut nassiussimasamini erseqqissaatigaa, ”inniminniilliornerit suulluunniit akuersaarneqarsinnaanngitsut akuersaarneqassanngitsullu”.
Sermitsiaq.AG-mit Siumumi siulittaasoq apersorusunneqarsimangaluarpoq, soorlu partiit allat siulittaasui apersorneqarsimasut, Kim Kielsenili allakkatigut nalunaaruteqarniarluni aalajangersimavoq.
Siumumi allatsiusimasoq Mikael Petersen arnanit qulinit kinguaassiuutitigut inniminniilliorfiginnittarsimasutut unnerluutigineqareermat nalunaaruteqarpoq.
Suliarli pineqartoq pillugu siulittaasoq oqaaseqarusunngilaq:
- Partimi allattorisimasatta suliassaataannut tunngatillugu toqqaannartumik oqaaseqarsinnaanngilanga soorlulusooq aamma inummut tunngasutigut allanut aamma oqaaseqaqqusaannginnama, Kim Kielsen Sermitsiaq.AG-mut allappoq.
Suliffik toqqissisimaffiussasoq
- Taamaattoq oqaatigissavara, kinaluunniit nuannaarluni toqqissisimanaralugulusuliartorsinnaasariaqarmat. Erseqqissarlara, inunnut allanut innarliinerit qanorluunniit ittut akuerineqarsinnaanngimmata aammalu qaqugumulluunniit akuerineqanngisaannartussaammata. Tamanna Siumukkunnut atuuppoq, soorlulusooq aamma suliffeqarfinnut allanut atuuttoq, Kim Kielsen allappoq.
Arnat qulit Mikael Petersenimut unnerluussutigisaanni takuneqarsinnaavoq, inniminniilliortoqarnerani angutit allat arlallit najuuttarsimasut, inniminniilliornernillu unitsitsisarsimanngitsut. Kingusinnerusukkut atorfilittaq qaffasissumik inissisimasoq oqaluttuarpoq, taamatut pissusilersortarneq Inatsisartuni partiit allaffeqarfiini nalinginnaasuusoq.
Ajornartorsiutaasoq paasigaa
Siulittaasup allakkamini paasisinnaanerarpaa, inniminniilliorfigineqarsimasut, inniminniilliornermik unitsitseqqullugu oqarsinnaasarsimannginnrat ajornartorsiutaasoq.
- Arnat pineqartut oqaluttuaat ajornartorsiutinik assigiinngitsunik marlunnik tunngassuteqarput.Oqaatigineqartup immikkoortua siulleq tunngatinneqarpoq suliffeqarfiusumi timikkutkinguaassiutitigut kanngutsaattuliornermut. Kanngutsaattuliornerit taakkua politinuteqqartuussivinnullu tunngasuupput, taamaattumik aammaarlunga inassutigissavara, pineqartutpolitinut nalunaarutigalugit suliassanngortissagaat, inatsisit pioreersut naapertorlugitsuliarineqarniassammata., Kim Kielsen allappoq.
Siulittaasoq apererusussimagaluarparput, partiimi Siumumi siulittaasutut ajornartorsiutinik aaqqiiniarluni suliniutinik aallartitsisimanersoq, aamma kinguaassiuutitigut inniminniilliortarnermut nikassaasarnermullu partii malittarisassaqarnersoq imaluunniit siunissami malittarisassaqalerniarnersoq. Kim Kielsenip allakkatigut nalunaarutaani tamanna eqqaaneqarsimanngilaq. Pitsaasumik oqaluttarnissamut pissusilersortarnissamullu tamatta akisussaaffeqarpugut, siulittaasoq allappoq.
Naameersinnaatitaaneq
- Taamaattumik pingaaruteqarpoq tamatta ataatsimoorluta tamanna akisussaaffigalugunalimmassaasariaqaratta ataqqeqatigiilluta, ingammik eqimattani ataatsimoorfiusunilukaterisimaartilluta. Tamanna suliffimmi aamma suliffiup avataatigut atuutsinneqassaaq. Tusagassiuutini oqaluttuarineqartut ilagaat sooq suliassat saqqummersinneqarsimanersut. Uannut apeqqutaanngilaq sunarpiaq siunertaasimanersoq oqaluttuarineqartut saqqummiunneqarnerinut. Uannut pingaartoq tassaavoq, oqaluttuat saqqummersinneqarmata, pissuseq akuerineqarsinnaanngitsoq allanngortinniassagatsigu, Kim Kielsen allappoq.