Kielsen: Inatsisartut ammaaqqinnissaq oqaluuserissavaat

Naalakkersuisut nunamik ammaaqqinnissamut periusissiaq saqqummiutissavaat, taanna Inatsisartuni ilaasorta oqaluusereriarlugu isummerfigissavaat, Naalakkersuisut Siulittaasuat Kim Kielsen oqarpoq.

Naalakkersuisut Siulittaasuata Kim Kielsenip, Kalaallit Nunaata ammaqqinneqarnissaanut periusissiaq, sisamanngormat ullup qeqqanut tusagassiortunik katersortitsinermi saqqummiuppaa.

Tassani Kim Kielsenip oqaluttuaraa, nunamik ammaaqqinnissamut periusissiaq Inatsisartunut saqqummiunniarlugu:

- Tamatuma kingorna ammaqqinnissaq qanoq ingerlanneqassanersoq aalajangiiffigineqassaaq, Kim Kielsen oqarpoq.

Oqaatigaa aammaaqqinnissaq pisariaqartoq:

- Mattuteqqaannarsinnaanngilagut. Nunarsuarmioqataavugut, Kim Kielsen oqarpoq.

Ammaanermi immikkoortoq siulleq:

Ammaanissami immikkoortoq siulleq Danmarkimi tunillatsittut ataaseq ataassimappagu, Danmarkimilu tunillatsittunik misissuinermi tunillatsissimasut 5 % qaangersimanngippassuk aallartinneqarsinnaassaaq.

Sapaatip akunneranut timmisartumut ilaallutik tikittut amerlanerpaamik 600-sarnissaat ammaanissap kingunerissavaa. Angalasut misissortinnermi tunillatsissimassanngillat, tikinnerullu kingornagut ullut tallimat qaangiunnerisigut misissortittassallutik. Angalasut tikereernermik kingorna tunillatsissimannginnermut misissorneqarnissartik tikillugu mattusimatinneqassapput. Tamatuma saniatigut massakkut peqqusinerit innersuussutillu aalajangiusimaannarneqassapput.

Ammaanermi immikkoortup aappaa:

Ammaanerup immikkoortuata aappaani Kalaallit Nunaanni tunillatsissimasinnaasut amerlassusaat ilisimaneqarlutillu suliarineqareersimassapput. Danmarkimi tunillatsissimasut 0,7-mik qaangiisimanngillat, Danmarkimilu innuttaasut misissuiffigineranni tunillatsittut amerlassusaat 2 %-imik qaangiisimanngillat.

Sapaatip akunneranut timmisartumut ilaallutik tikittut amerlanerpaamik 1200-iusarnissaat ammanerup kingunerissavaa. Angalasut aallarnissaq sioqqullugu misissortinnermi tunillatsissimassanngillat, tikereernerullu kingorna ullut tallimat qaangiunnerisigut misissorteqqissallutik. Angalasut misissortinnermi tunillatsissimannginnermut inernerit pigilernissaat tikillugu mattusimaneqassapput. Tamatuma saniatigut massakkut peqqusinerit innersuussutillu aalajangiusimaannarneqassapput.

Ammaanermi immikkoortut pingajuat:

Ammaanerup immikkoortuata pingajuanni Kalaallit Nunaanni tunillatsissimasinnaasut amerlassusaat ilisimaneqarlutillu suliarineqareersimapput. Danmarkimi tunillatsissimasut amerlassusaat 0,5 -imik qaangiisimanngilaq, Danmarkimilu innuttaasunik misissuinermi tunillatsissimasut amerlassusaat 1 %-imik qaangiisimanngillat.

Ammaneq timmisartunut ilaasut amerlassusiisa killilersuiffigineqannginnissaannik kinguneqassaaq. Angalasut tikereerlutik tunillatsissimannginnermut misissortissapput. Massakkut innersuussutaasut ingerlaannassapput, peqqusinerilli unitsinneqarlutik.

Innuttaasut tamarmik COVID-19-imut ersiuteqarnerlutik misissortissapput, nappaammullu ersiuteqartoqarpat angalannginnissamik kikkut tamarmik kaammattorneqarput.

Immikkoortoq 1-imut ikaarsaarnissamut piffissamut pilersaarut Inatsisartuni oqallittoqareerpat aalajangiiffigineqassaaq.

Kim Kielsenip oqaatigaa, ammaaqqinneq naalagaaffeqatigiit iluanni siullermik pissasoq naatsorsuutigineqartoqt.

Kim Kielsenip oqaluttuaraa, inuit 600-t sapaatip akunneranut nunamut isersinnaasunngorlugit periusissiamik ilaatigut suliaqartoqartoq:

- Nunamut tikikkaagamik missorneqartassapput mattuteqqasassallutillu. Danmarkimit aallannginnerminni ullut marluk sioqqullugit coronavirusimut misissorneqartassapput, tamatuma saniatigut inuit ataasiakkaat napparsimalernerminni allanik eqqarsaateqartarnissartik namminneq akisussaaffigaat, Kim Kielsen oqarpoq.

Powered by Labrador CMS