Skip to main content

Kielsenimut tatiginnikkunnaarnermik taasititsinissamut piumasaqarneq Atassummeerpoq

Nipisattassiineq pillugu oqallinnissamut siunnersuutip aallartinneranit akunnerit arfinillit qaangiuttullu, illuatungiliuttut ataatsimoortut Kielsenimik tatiginnikkunnaarnerminnut oqaaseqaataat Atassutip Inatsisartut siulittaasuannut tunniuppaa.

Oqallinneq sivisungaatsiartumik sukangasuumillu ingerlanneqareersorlu, Hans Enoksen oqaluttarfimmit aqqarsimalersorlu, Atassummit Aqqalu Jerimiassenip oqaluttarfimmut qaqigami oqallinneq qasukkaamisorinarsinnaagaluarpoq.

Kim Kielsen Demokraatillu ilaasortaatitaat Inatsisartuni ilaasortaatitaat inersuarmit anigaluarput. Anisimatsiaannarli iseqqipput, Aqqalu Jerimiassenimmi tupaallannaqisumik Kielsenimut tatiginnikkunnaarnermik taasititsinissamut piumasaqartoqarnera saqqummiuppaa.

Tatiginnikkunnaarnermut tunngavilersuut allanngortinnagu

Naalakkersuisut ulloq 12. Maj aalajangiipput aqutsisoqarfiup aappaani nipisanniarneq ammaqqinneqassasoq siorna pisassat sinneruttut 204 ton-siusut ukioq mannamut nuunneqarnerisigut.

Tamatuma kingorna Kukkunersiuinermut Ataatsimiititaliap misissuinini aallartippaa tusagassiorfinniit oqariartuutigineqarmat, Naalakkersuisut siulittaasuata angallataa nipisanniutitut atukkiunneqarsimasoq nipisanniarnerup ammaqqinneqarnissaanik Naalakkersuisut aalajangernerisa nalaanni. Apeqqut tassaasimavoq, Naalakkersuisut aalajangernerat pisimava, suliamut attuumassuteqarpallaarsinnaaneq pillugu aaliangersakkat mianeralugit.

Tamanna pillugu Kukkunersiuinermut Ataatsimiititaliap nalunaarusiani 7. September tunniuppaa.

Kammeradvokati naliliinermini allappoq:  

”Suliamik suliarinninnermi Siulittaasoq pingaarutilimmik inissisimareerami, suliami pineqartumi aningaasaqarnikkut soqutigisani pillugit Naalakkersuisunut nalunaarfiginnittussaatitaasoq naliliivunga. Allatut oqaatigalugu suliamut attuumassuteqarpallaartoqannginnera ima erseqqitsiginngilaq, allaat nalunaarfiginnittoqartariaqarani […] Taamaalilluni Siulittaasoq pissutsit pillugit Naalakkersuisunut ilisimatitsinissaminut tunngavissaqarsimavoq – naliliineralu malillugu taamak iliorsimasariaqaraluarluni – tamanna pisassiissutit amerlineqarnissaannik KNAPK-mit qinnuteqaateqartoqarnerata kingorna piaarnerpaamik […] 

Naalakkersuisut pisassiissutit amerlineqarnissaannik suliarinninnginneranni nalunaarfiginnittoqarsimasariaqaraluarneranik Kammeradvokatip naliliinera Kukkunersiuinermut Ataatsimiititaliamit isumaqatigineqarpoq.

Kukkunersiuinermut Ataatsimiititaliaq nalunaarusiani ilaatigut imatut inernilerpaa:

Issuaaneq aallartippoq:

“Siulittaasup pisassiissutit amerlineqarnissaannik suliarinninnerup aallartinnginnerani suliamut attuumassuteqarpallaarsimasinnaaneq pillugu isumaliutiminik Naalakkersuisunut nalunaarfiginnis-simannginnera ataatsimiititaliamit sakkortuumik uparuarneqarpoq. Aammattaaq Naalakkersuisut pisassiissutit pillugit siunnersuummik suliarinninnginneranni Naalakkersuisunut ilaasortat ilaasa suliamut attuumassuteqarpallaarsinnaanerannik nalilersuisoqarsimasungannginnera ataatsimiititaliamit isornartinneqarpoq. 

Naalakkersuisut Siulittaasuata suliami matumani suliamut attuumassuteqarpallaarsinnaanermut apeqqummik eqqumaffiginnissimannginnera ataatsimiititaliap sakkortuumik uparuarpaa tamannalu Inatsisartunut immikkut maluginiaqqullugu.

Aammattaaq Naalakkersuisut allagaatinik ataatsimiititalianut tunniussinissaminnut piumassuse-qannginnerat ataatsimiititaliamit ajornartorsiuterujussuartut isornartorujussuartullu isumaqarfigi-neqarpoq. Naalakkersuisut pissusilersornerat Inatsisartuni ataatsimiititaliat suliassaminnik, ilaatigut Naalakkersuisunik nakkutilliinermik imaqartunik isumaginnissinnaanerannut pisariaqanngikkaluamik akornusersuutaavoq”. Issuaaneq naavoq

Ataatsimiititaliap nalunaarusiamigut uppernarsarpaa, pisortat ingerlatsineranni suliassat suliarineqartarnerat pillugu Inatsisartut inatsisaat nr. 8, 13. juni 1994-imeersoq Naalakkersuisut sulittaasuata unioqqutikkaa. Inatsisartut inatsisaanni §6, stk. 1 issuaavigaara:

“§ 6. Kialuunniit pissutsinik § 3, imm. 1-imi taaneqartunik pissuseqartumik ilisimannittup oqartussaaffimmi qullersarisani piaartumik tamatuminnga nalunaarfigissavaa, erseqqilluinnanngippat pissuserisat pingaaruteqanngitsuusut. Ingerlatsinermut oqartussaaqatigiinnut ilaasortat taamaattunik ilisimasaqarfigineqarpata tamakku oqartussaasunut nalunaarutigineqassapput.” Issuaaneq naavoq.

Aammalu Naalakkersuisut pappiaraatinik tunniussiumannginnerat annertoorujussuarmik ajornar-torsiutaavoq aammalu Ataatsimiititaliat sulinerat akornuserujussuarneqarluni.

Erseqqissaatigissuarput Naalakkersuisuniit kammeradvokatimut attaveqassutaasarsimasut ulloq manna tikillugu suli Inatsisartunut nassiunneqarsimanngimmata. Taamatullu suli paasissutissiis-sutigineqarani, sorpiaanuku kammeradvokatimut nalilersoqqullugit piumasarineqarsimasut. 

Taamannak tunngavilersuuteqarluta Naalakkersuisut siulittaasuannut tatiginninnginnermik saqqummiivugut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER