innuttaasunik ataatsimiititsineq
Kielseni Sisimiuni innuttaasunik oqaloqatiginnittoq
Naalakkersuisut siulittaasuata Kim Kielsenip (S), Sisimiuni innuttaasunut ataatsimiisitsinerani 50-it missaanni takkuttunit politikkikkut oqalliffiuvoq.
Peqataasut apersuerusussuseqarlutillu paasisaqarusussimapput.
- Sisimiuniik Kangerlussuarmut aqqusineq
- Saarullinnut qaleralinnullu akigitinneqartut
- Misileraalluni eqqusarniarsinnaaneq kiisalu nunatsinnut uteraanni piniarnermut aalisarnermullu allagartartaarnissamut malittarisassat qasukkarneqarsinnaanerat
- Soraarnerussutisiaqarnerup aaqqissuuteqqinneqarnerata imarisaa.
- Qaqugu oqaatsivut allaffissornermi pingaarnerulissasut.
- Meeqqat kinguaassiutimikkut atornerlunneqarsimasut inersimasullu kingunerlutsitsisut sullinneqarnerat.
Naalakkersuisut Siulittaasuat Kim Kielsen tusagassiuutinut nalunaarummi oqarpoq:
Sisimiuni innuttaasut tikillugit ataatsimeeqatigisinnaasimanerat nuannaarutigaara. Oqallinneq nuannersumik ingerlavoq apeqquteqarusussuseqarluarpullu. Isumaga malillugu innutaasut tikillugit naapissinnaanerat ammasumik ingerlatsineruvoq. Taamaaliornikkut Naalakkersuisut sulinerannik toqqarlugit oqaluttuarfigisinnaavakka apeqqutillu oqariartuutillumi ingerlaannaq akisinnaallugit. Taamannak attaveqaqatigeeriaaseqarneq isumassarsiorfiulluartarpoq innuttaasullu qanoq atugaqarnerannik takutitsilluartarluni.
Naalakkersuisut Siulittaasuata innuttaasunik ataatsimiititseqqissaaq. Innuttaasunik ulluni makkunani ingerlanneqartussat tassaapput:
- Ilulissat pingasunngornermi ulloq 8. marsi 2017 nal. 19.30 – 21.30 Majoriami.
- Qasigiannguit sisamanngornermi ulloq 9. marsi 2017 nal. 19.00 – 21.00 Efterskole Villads Villadsenimi
- Aasiaat tallimanngornermi ulloq 10. marsi 2017 nal. 19.00 – 21.00 Katersortarfimmi