Kielsen: Erik Jensenip unnerluussutai tunngavissaqanngillat.

Kim Kielsen-ip siulittaasunngorniunnermi unammillertaata Erik Jensen-ip Kielsenimut, ilaatigut Kielsen-ip nalaani pisuut pisuuneruleraluttuinnarnerarlugit piitsullu piitsunngoraluttuinnarnerarlugit unnerluussutai tunngavissaqannginnerarpai: - Erik Jensen nammineerluni inuiaqatigiinni naligiinnerusumik ineriartortitsisoqarnissaa pillugu aalajangiinerpassuarnut peqataasarnikuuvoq, Kim Kielsen oqarpoq.

Erik Jensenip unnerluussutai Kim Kielsenip tunngavissaqannginnerarpai.

Qularutigineqarsinnaanngilaq Siumup siulittaasua, Kim Kielsen partiimini Siumumi siulittaasutut inissisimanermini qinigaaffik 2017-2020 politikkikkut sakkortuumik anorersuarsiortinneqartartoq.

Aviisi Sermitsiaq taama allappoq.

Isumaliortoqarsinnaagunaraluarpoq malissiornerit sakkortunersaat Inatsisartuni illuatungiliuttut pilersittarsimassagaat, taamaanngilarli, tassami Kielsenip nammineq tunuliaqutai tassaapput eqqissiumanngitsut siulittaasuminnullu eqqissilluni suliassaminik aallussinissaanut akimmisaartitsisut:

- Qinigaaffimmi maanna qaangiutilersumi arlaleriarluta partiip iluani tamaviaartariaqarnikuuvugut pisut ataqatigiissinniarlugit arlaleriarlutalu maanaannaq qinersinissaq pinngitsoortinniartariaqarnikuuarput partiimi ajornartoornerit annertuut anigorniarnerisigut. Tassami eqqissiumanngitsoqarpoq aammalu aporaassutissarsiortoqarpoq ataavartumik, taamaattorli maannamut allorissaaqatigiileqqittuaannarpugut, tassungalu pissutaavoq uppernarsaatissaqarmat uanga siulittaasutut inissisimaninni partiip malittarisassai, naleqartitai aammalu minnerunngitsumik anguniagai ataatsimeersuarnerni aalajangersarneqartartut naapertorlugit sulisunga, Siumup siulittaasua Kim Kielsen Sermitsiamut oqarpoq.

Jensen nammineq peqataavoq

Kim Kielsen (S) matumani innersuussivoq Erik Jensen (S), Inatsisartunut qinigaagamili nammineerluni inuiaqatigiinni naligiinnerusumik inissisimalernissaq anguniarlugu sulinermi peqataajuarsimammat, angusarisimasanilu naammagisimanngikkunigit, Jensen-ip nammineerluni tamanna nalilersortariaqassagaa:

- Assigiimmik akeqartitsineq atuutilerseqqinnikuuarput, sanaartugassat iluarsagassallu ataqatigiissakkamik sineriammi siammasissumik pilersaarusiorneqartarput, sulinermi ilanngaat atuutilersinnikuuarput, akileraarutitigut aalaakkaasumik ingerlatsisoqarpoq, utoqqartavut utoqqalinersiamik saniatigut piiaaffigineqanngikkaluarlutik isertitsisinnaalernikuupput. Taasakka assersuutaannaapput piffissami uanga siulittaasuuninni angusimasatta ilaattut, Siumumi aammalu Naalakkersuisuni siulittaasoq, Kim Kielsen Sermitsiamut oqarpoq.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS