Kielsen: Atuarfiit timmisartukkullu angallaneq matuneqassapput
Naalakkersuisut Siulittaasuata Kim Kielsenip, marlunngormat ualikkut pingasunut tusagassiortunik katersortitsinermi ilisimatitsissutigaa, aalajangiunneqarsimasoq nunami atuarfiit matuneqassasut, taamaallaallu meeqqanit, inuiaqatigiinni pingaaruteqarluinnartunik suliaqartunik angajoqqaalinnit atorneqarsinnaassasut.
Nunami angajoqqaarpassuit coronap tuniluunnissaannut ernnumateqarmata Naalakkersuisut marluunngormat aalajangersimapput, meeqqat atuariartortinneqartassanngitsut, angajoqqaat angerlarsimaffimmi paarsisinnaappata.
Matusineq ataasinngorpat ullaamiit atuutsinneqalissaaq. Aalajangiussarlu ataasinngorpamiit ulluni 14-ini atuutissalluni.
Atuarfiilli meeqqanut, assersuutigalugu peqqinnissaqarfimmi, politiini allanilu oqartussaqarfiusuni pingaarutilinnisulisunik angajoqqaalinnut suli ammatinneqassapput.
Kommunit aamma ulluni kingullerni, ungasissumit ilinniartitsisinnaanerup qanoq qulakkeerneqarsinnaanera pillugu pilersaarusiorsimapput.
Partiit allat peqatigalugit aalajangiisoqarpoq, Kim Kielsen nassuiaavoq, meeqqeriviilli matuneqassanngillat.
-Innuttaasut ernumanerat paasisinnaavarput, tusarnaapavullu, Kim Kielsen aalajangiineq pillugu oqarpoq.
Timmisartukkut angallanneq matuneqassasoq
-Piareersarsimasarput maassakkut tullinnguupoq. Danmarkip Kalaallillu Nunaata akornanni timmisartukkut angallanneq tallimanngorpat unnuap qeqqanut matuneqassaaq. Nunami timmisartukkut angallanneq aamma matuneqassaaq, Kim Kielsen timmisatukkut ilaasartut ikiliartupiloornerarlugit oqaluttuartoq ilisimatitsivoq.
Kim Kielsenip ilisimatitsissutigaa, atuarfiit matuneqarnissaat timmisartukkullu angallattoqarunnaarnissaa politikkikkut aalajangiinerusoq, aamma partiit allat siulittaasuinit tapersersorneqarnerarpoq.
-Nunamut tikissimasut ilaat angerlarsimaffimmi mattuteqqanissamut inassuteqaatinik malinnissimmanngillat, tamannalu toqqissisimannginnermik pilersitsisimavoq. Erseqqissaatigissavara inassuteqaatit malinneqassammata. Imminuinnaq eqqarsaatiginani, inuiaqatigiit eqqarsaatigineqassapput, Kim Kielsen erseqqissaavoq.
Aningaasarsiatigut taartisisinnaaneq
Naalakkersuisut Siulittaasuata nassuiaatigaa, angajoqqaat suliartoqaratik meeqqaminnik paarisariaqarunik aningaasarsiatigut taarsiiffigineqarsinnaasut.