Kielsen: Ataatsimoornerput attatiinnartigu
Naalakkersuisut Siulittaasuata Kim Kielsenip ukiortaami oqalugiarami, coronavirusip tuniluutsinnaveersaarneqarneranut atatillugu innuttaasut paasinnissimanerannut qujassuteqarfigai.
- Kissaatigaara nualluussuup atuunnerani ataatsimoorneq takutitarsi nualluussuup qaangiunnerani attatiinnarumaaripput, siulitta imminnut ikioqatigiittarnerisa anersaavanik takutitsilluinnartuummat, Kim Kielsen tuniluuttoqarneranik akiuiniarlutik suliaqarsimasut ilanngullugit qujassuteqarfigalugit oqarpoq.
Kim Kielsenimit neriuutigineqarpoq ukiumi 2021–mi ullut sungiusimavut uteqqikkumaartut.
- Ukioq 2021–mi ullut sungiusimasatta uteqqinnissaat neriuuteqarfigivakka. Ukiuni kingullerni arlaqartuni nunatta aningaasarsiornera siuariartorsimaqaaq. Ukioq 2020 aningaasarsionikkut unikaallaffiusimagaluartoq, aningaasaqarnikkut inissisimalluarnitta ingerlaannarsinnaanerput qulakkeerpaa, nunap siuttuata erseqqissaatigaa.
Aningaasaqarnikkut siuariarneq
Suliniutaasimasut arlallit najugaqarfinni tamani aningaasaqarnikkut siuariartitseqataasimasut taagorpai, ilaatigut akit assigiilerseqqinneqarsimanerat oqaatigalugu.
Takornariartitsinerup inerisaqqinneqarnissaa, suliffissaaleqisut ikilisimanerat atlantikukkoortaatinullu mittarfissat nutaat suliarineqarnerisa aallartinneqarsimanerat ilanngullugit eqqaavai. Kim Kielsenillu erseqqissaatigaam Kujataani Qaqortoq timmisartoqarfittaassasoq.
- Kalaallit Nunaata kujataani ineriartorneq siuariassappat, Qaqortumi mittarfissualiortoqarnissaa avaqqunneqarsinnaanngilaq, Kim Kielsen Namminersorlutik Oqartussat ingerlatseqatigiiffiutaata Royal Greenlandip kilisaataatini "nunarsuarmi nutaaliaanerpaanik" taarsersuineranik nuannaarutilik oqarapoq.
Ilanngullugu aamma oqaatigaa Air Greenlandip qulimiguuliutiminik nutaanik taarsersuinera, assartuummik nutaamik umiarsuaqalersimanera nunaqarfinnullu assartuutinik pingasunik peqartoqalersimanera nunamut iluaqutaassasut.
Utoqqatserneq
Kalaallit meerartaat 22-t 1951-imi misiliutitut pinngitsaaliissumik Danmarkiliartinneqarsimasut oqalugiaammi aamma eqqaaneqarput, tassani Kim Kielseni oqaatigaa, ministeriunerup Mette Frederiksenip utoqqatsissuteqarnera ”inissaminiittoq”.
- Maannalu utoqqatsertoqareernerata kingorna pineqartut ajunnginnerpaamik inuunerminnilu pitsaasumik ingerlariaqqinnissaannik qamannga pisumik kissaappakka, Kim Kielsen oqarpoq.
Oqalugiaat tamakkerlugu Naalakkersuisut nittartagaanni atuarneqarsinnaavoq