Kielsen USA-mit siunnersorneqartarnissamut akuersisoq
Naalakkersuisut Siulittaasuata Kim Kielsenip nuannaarutigaa, 83 millioner koruunit nalingannut, amerikamiunit ilisimasalinnit siunnersorneqartarnissamik Amerikami naalakkersuisut ikiorsiissuteqarniarnerat.
Namminersorlutik Oqartussat tusagassiorfinnut nalunaaruteqarnermi ilisimatitsissutigaat, Amerikamiut "suleqatigiinnissamik" neqerooruteqarnerat Naalakkersuisut akuersaarniarlugu aalajangersimasut.
- Kalaallit Nunaanni suliassaqarfiit Kalaallit Nunaanni aningaasarsiornerup siuariartornissaanut iluaqusiisinnaasut isiginiarneqarnissaat amerikamiunit kissaatigineqarpoq, matumani aatsitassarsiornermut, takornariaqarnermut illinniartitaanermullu tunngassuteqartut ilanngullugit. Isumaqatigiissutit atuuttut tunngavigalugit Naalakkersuisullu qanimut suleqatigalugit suliniutit piviusunngortinneqassapput, tusagassiorfinnut nalunaarummi allassimavoq.
Aningaasat USA-p Kalaallit Nunaanni aningaasaliissutiginiagaat 12,1 millioner koruuniupput dollarsiupput, tassa 83 millioner koruunit nalingajaat. Kalaallilli Nunaat 12,1 millioner dollarsit nalingannik checkimik tunineqarnissaa matumani pineqanngilaq.
- Aningaasaliissutit amerikamiunit immikkut ilisimasalinnit siunnersortinit ikiorserneqartarnissanut aammalu amerikamiut nunanut allanut ministeeriaqarfiata suliniutaanut pioreersunut atorneqarnissaat naatsorsuutigineqarpoq, tusagassiorfinnut nalunaarutip naggataani atuarneqarsinnaavoq.
Kim: Piffissaq sivisooq atorneqassaaq
Kim Kielsen amerikamiut neqeroorutaat pillugu imatut oqarpoq:
- Nunanik allanik qaninnerusumik suleqateqalersarnerit piffissami sivisuumi ineriartortinneqartarput. Nutaarsiassaq nuannersoq una tunngavigalugu USA-mik pitsaasumik suleqateqalernissatsinnik suliniuteqarsimanerput asuliinaasimanngitsoq uppernarsarneqarpoq. Kalaallit Nunaata USA-llu akornanni suleqatigiinnerup annertusarneqarnera, Kalaallit Nunaanni suliniutinut USA-p aningaasaliineranik aalajangersimasumik kinguneqartoq pitsaasuuvoq.
Ilisimatitsissutigineqarpoq, "illersornissamut tunnganngitsunik suliniutinut suleqatigiilernissaq ilaatigut Naalakkersuisut amerikamiullu nunanut allanut naalakkersuisoqarfiata paaseqatigiinnissamik isumaqatigiissutillu pillugit nalunaarutit (MoU) 2019-imi junimi naammassineqartut inernerisa ilaattut isigineqassaaq".
Amerikamiut tapiissuteqarniarnerat pillugu, Amerikamiut Københavnimi aallartitaata Carla Sandsip sapaatip akunnerani matumani siusinnerusukkut tamanut saqqummiussaa, danskit kalaallillu politikkeriisa eqqarsarnartorqartillugu oqaatigisimavaat.