Kielsen sassaqqippoq

Marlunngormat immikkut ittumik qinersinissaq aalajangiunneqarmat Naalakkersuisut siulittaasuat Kim Kielsen ukiut arfinillit nunatsinni siuttutut inissisimareersoq inuulluaqquneqarmat misigissutsit sakkortuut nittarsaanneqarput. Taamaattorli Kielsen nukissaqarluarpoq aammalu politikkimik suliaqarnerminik unitsitsinissaminik pilersaaruteqanngilaq. Nalunaarpormi arlaannaataluunniit qularissanngikkaa nammineq sassaqqinnini partiini aqutsisutut imminik atorunnaarsitseqqammertoq sinnerlugu.

Isumaqartoqarsimaguni angut piffissami sivisuumi politikkikkut anorersuarsuup qeqqarpiaani inissisimasimasoq nukissaalatsilersimassasoq, taamak isumaliortut pissutissaqanngitsumik isumaliorsimassapput, aviisi Sermitsiaq allappoq.

55-nik ukiulik Kim Kielsen Inatsisartunut qinersinermi imminut neqeroorutigeqqippoq, tamatumuuna siuttutuunngitsoq, partiiminili Siumumi ilaasortatut nalinginnaasutut sassarluni.

Qinersinermi kingullermi 24. april 2018-mi ingerlanneqartumi Kielsen 2.163-nik inuttut taaguunneqarpoq, aammalu partiini Siumut nunatsinni partiit annersaattut 7.957-nik katillugit taaguunneqarluni inisseqqimmat akisussaaffimmik annerpaamik tigumminnippoq, taamaalillunilu partii unammiuaartuagartik Inuit Ataqatigiit ajugaaffigalugu, IA katillugit 7.478-nik taaguunneqarmat.

Piumassuseq nukissallu pigivai

- Sooq sassaqqissallutit aalajangerpit?

- Inuiaqatigiinnut akisussaaffeqarlungalu pisussaaffeqartutut misigisimavunga, aamma inuiaqatigiinnut qinikkatut suleqqinnissannut piumassuseqarlungalu nukissaqarluarpunga, Kim Kielsen Sermitsiamut oqarpoq.

Aviisimi Sermitsiami allaaserisaq tamakkerlugu atuarsinnaavat. Aviisi uani pissarsiariuk:

Powered by Labrador CMS