Kielsen qinersisoqarmalli sisamassaanik naalakkersuisooqatigiiliulersoq
Kim Kielsenip Siumut, Nunatta Qitornai Demokraatillu peqatigalugit naalakkersuisooqatigiit nutaat ullumi saqqummiutissagai Sermitsiaq.AG-mit paasineqarpoq. Kim Kielsen taamaalilluni ukiut marluk ingerlaneranni sisamassaanik naalakkersuisoqatigiiliulerpoq.
Siumut, Demokraatit Nunattalu Qitornai ullumi tallimanngornermi qulinut tusagassiortunik katersortitsinissamut qaaqqusisimapput. Sermitsiaq.AG-p paasissutissaatai naapertorlugit, partiit naalakkersuisooqatigiit nutaat saqqummiunniarpaat, partii maanna tapersersortaasoq, Demokraatit, naalakkersuisooqatigiinnut ilannguttussanngorput.
Taamaalilluni Kim Kielsen 2018-imi upernaakkut Inatsisartunut qinersisoqarmalli sisamassaanik naalakkersuisooqatigiittussanik pilersitsisussanngorpoq. Taamanikkut qinersisoqareersoq Siumut, Partii Naleraq, Atassut Nunattalu Qitorni naalakkersuisooqatigiilerput. Tamanna pivoq maj 2018-imi.
Taamanikkut ukiakkut Partii Naleraq naalakkersuisooqataajunnaarpoq. Tamanna pivoq danskit naalagaaffiat Ilulissani Nuummilu timmisartoqarfinnik nutaannik piginneqataalermat.
Ikinnerussuteqarlutik naalakkersuisooqatigiit qinersisoqarnissaanik pinngitsoortitsisut
Taamanikkut pisssangassutigineqarsimavoq, Kim Kielsen amerlanerussuteqartumik naalakkersuisunngortitsissanersoq imaluunniit qinersititsissanersoq. Naggataatigut Kim Kielsenip ikinnerussuteqarlutik naalakkersuisooqatigiit, tassaa Siumut, Atassut Nunattalu Qitornai, Demoktaatit naalakkersuisooqatigiinnut tapersersortaasut, saqqummiuppai.
Atassut april 2019-imi naalakkersuisooqatigiinnit tunuarmat naalakkersuisooqatigiit allanngorteqqinneqarput. Taamanikkut Atassummi siulittaasuusup naammaginanngitsumik suleqatigiittoqarnera pissutaatippaa.
Tamanna sioqqutitsiarlugu Atassut sinnerlugu Naalakkersuisuutitap Aqqalu Jerimiassenip, apersorneqarnermini silaannaap allanngoriartornerata inunnit pilersinneqarsimanera akerlileramiuk isorineqangaatisarpoq.
Taamanikkulli Kim Kielsenip naalakkersuisuutitai Siumumit Nunattalu Qitornaanit inuttaqartinneqarput, Demoktaatit naalakkersuisooqatigiinnut tapersersortigalugit.