suleriaaseq
Kielsen qaqugukkut oqaaseqarsinnaava?
Inatsisartut Siulittaasoqarfiata oqaaseqarsinnaanermut malittarisassast nutaat saqqummiussai, Naalakkersuisut ilalersinnaanngilaat. Siulittaasoq, Kim Kielsen, oqallinnermi qaqugukkulluunniit oqaaseqarsinnaassasoq Naalakkersuisut piumasaraat.
Inatsisartut Siulittaasoqarfia suleriaatsimut allannguutissatut siunnersuummik Naalakkersuisut akuererusunngisaannik saqqummiussaqarpoq. Tamanna Naalakkersuisut siulittaasuat, Kim Kielsen, Inatsisartuni oqallittoqartillugu qaqugukkut oqaaseqarsinnaaneranut tunngassuteqarpoq.
Lars-Emilip saqqummiussaa
Lars-Emil Johansenip allaffeqarfianit saqqummiunneqartumi atuarneqarsinnaavoq, Naalakkersuisut siulittaasuat minutsit marluk imaluunniit tallimat tikillugit oqallisigineqartup suliarineqarnerata naammassineqarneranut oqaaseqarnissamik piumasaqarsinnaasoq.
Taamalilluni siulittaasoq ''periarfissinneqassasoq oqaluuserisassani immikkoortup naammassineqannginnerani oqaaseqartussatut kingullertut oqaluuserisassani immikkoortut ataasiakkaat pillugit isumaqatigiinniarnerit naggasertarnissaannut'', Lars-Emil Johansenip allaffeqarfianit nassuiaatini tamanna allaqqavoq.
Naalakkersuisut tamanna isumaqatiginngilluinnarpaat, Inatsisartullu 2016-imi ukiakkut ataatsimiinnermi aalajangiinerannut unnersuussipput, tassani atuarneqarsinnaavoq ''Naalakkersuisut Siulittaasuata tamanna kissaatigiguniuk qaquguluunniit Naalakkersuisut Siulittaasuatut oqaaseqarnissamik piumasaqarsinnaasoq”.
Tunngavilersuut
- Suleriaasissap allanngortinneqarnissaanik siunnersuuteqarnermi Naalakkersuisut Siulittaasuat aatsaat naggasiutigalugu oqaaseqareernerup imaluunniit oqaaseqarnermut piffissaliussanut maleruagassat allat atorneqareernerisa kingorna Naalakkersuisut sinnerlugit oqaaseqarnissamut periarfissaqalissaaq. Tamatuma malitsigisaanik Naalakkersuisut Siulittaasuat oqallinnerup pissusissamisoortumik aammalu allanngorartuartumut ilaatillugu Naalakkersuisut tamarmiusut sinnerlugit akissuteqarsinnaanissamut periarfissaqassanngilaq.
Naalakkersuisut tamanna tunngavigalugu inassutigaat Inatsisartut siunnersuummut saqqummiunneqartumut ilusimisut iluseqartillugu tapersiissanngitsut.