Kielsen-ip septembarimi Trump-imik naapitsinissani pillugu: Kalaallit Nunaata soqutigisaasa siuarsarnissaannut periarfissaq assissaqanngitsoq

Ilaatigut aappaagumut aningaasanut inatsisissap inissinniarnissaanik aammalu Inatsisartut ukiakkut ataatsimiinnissaannut naalakkersuisut saqqummiutissamaagaat piareersarlugit naalakkersuisut ulapputeqareeraluaqalutik qaavatigut maanna aatsaat iluamik ulapputileqqapput.

Tassami USA-p præsidentianik Naalakkersuisut siulittaasuata Kielsen-ip septemberip aallartisimalernerani ataatsimeeqateqarnissaa sioqqullugu inuiaqatigiit kalaallit tamarmik ataatsimoortumik apuussassat minnerpaaffia tikillugu pilersaarusiugaalluarlutillu ataqatigiissinniarneqartussaapput.

Naak massa ataatsimeeqatigiinnissamut piareersaatit tassanngaannarlutillu tupaallatsilaavissortoqaraluartorlu, piffissaq atorluarneqapallappoq, ilaatigut naalakkersuisut siulittaasuata naalakkersuisoqarfiani aammalu nunanut allanut naalakkersuisoqarfimmi manna tikillugu USA-mik nunatta suleqateqarnera nalilersorneqaleruttorpoq, tassami Trump-imik ataatsimeeqateqarneq pissagaluarpat pissanngikkaluarpalluunniit, piffissami matumani annertoorujussuarmik malunnaatilimmillu nunatta USA-llu akornanni suleqatigiinneq inerisarneqarpoq, assersuutigiinnarlugu Jess Svane-p amerikamiut nukissiuuteqarnermut naalakkersuisoqarfianik suleqateqarluni issittumi isumannaatsumik nukissiuutitigut pilersuinissamik isumaqatigiissuteqartoqaqqammerpoq, tassanilu ilaatigut issittumi inukiffiusumi nukissiuutit ataavartut qanoq inerisarneqarsinnaanersut misissorneqartunut ilaavoq.

Taamaattorli tassa Kalaallit Nunaata/Danmarkip aammalu USA-p akornanni suleqatigiinneq pillugu ataatsimeeqatigiinneq taamak qaffasitsigisumik ingerlanneqartussaq minnerpaaffia tikillugu pilersaarusioqqissaarneqartussaavoq.

Taamaammat aamma Naalakkersuisut Inatsisartunik akuutitsissallutik sulissuteqarput. Pilersaarutaavormi Inatsisartut Nunanut Allanut Sillimaniarnermullu ataatsimiititaliaat Naalakkersuisunit aggersarneqarsimalereerpoq, naatsorsuutigineqarporlu ataatsimiinneq pissasoq tallimanngorneq 9. august.

Ataatsimeeqatigiinnermi tassani naalakkersuisut siulittaasuata Kim Kielsen (S)-ip ataatsimiititaliami ilaasortat ataatsimiinnissaq pillugu ilisimatissavai, taamatuttaaq ataatsimiititaliaq periarfissaqassaaq nunat siuttuisa ataatsimeeqatigiinnerini nunatta oqariartuutissai pillugit itisilikkamik samminnissalluni. Tamannalu pitinnagu, tassa ataatsimiititaliap pineqartup ataatsimeeqatiginissaa pitinnagu, Kielsen Trump-imik ataatsimeeqateqarnissani pillugu itisilikkamik oqaaseqarumanngikkallarpoq, taamaattorli aamma ima erseqqissaateqarpoq:

- USA-mi assigiinngitsutigut suleqatiginnippugut, allaallu aamma naalakkersuinikkut suleqatigiissutissatut arlalinnik isumaqatigiissuteqarfigalutigu, assersuutigiinnarlugu Igalikumi isumaqatigiissut aammalu Itillimi isumaqatigissut matumani eqqaaginnarsinnaavagut, ajunngilluinnarpoq isumaqatigissuteqaratta aammalu isumaqatigiissutit matumani assersuutigisakka piummata, taamaattorli naammanngilaq isumaqatigiissutinik kusanartunik oqaasertalinnik peqarnissarput annertunerusumillu timitalersunngikkutsigit, isumaqarpunga manna tikillugu pikkorluppallaarsimasugut taamaalillutalu isumaqatigiissutit periarfissaanik atorluaannerujussuusinnaanerput qatangiinnartippallaartarsimagipput. Maannakkut allaanerussaaq. Suleqatigiinnissamik neqeroorutit ilassilluassavavut taamaaliussaagullu nutaamik aammalu sakkortusisamik timitalersuisinnaassuseeqarluta. Maannalu Trump-ip taassumalu naalakkersuisuutitaasa issittumi annertuumik politikkikkut soqutigisaqarnerat, uagutsinnut annikigisassaanngitsumik iluaqutissiisinnaavoq, aatsaalli tamanna pisinnaavoq nukivut eqqortumik atorutsigit, tamannalu pippat iluaqutissat annertuut annikinnerusullu amerlaqisut periarfissaalersissinnaavagut, asersuutigiinnarlugu imartatsinni aammalumi issittumi tamarmi angallanneq annertuseriarujussuarnikuuvoq, uagullu ikingaaratta annertuumik ajutoortoqassagaluarpat ikiuisinnaanerput killeqartorujussuuvoq, taamaammallu taamatut pisoqassagaluarpat allanit ikiorneqarnissarput pinngitsoornata pisariaqartissavarput, imaassinnaavoq suleqatigiinneq nutaaliaasoq maanna ingerlatiligarput aqqutigalugu amerikamiut annertuumik annaassiniarnermut upalungaarsimasuutitai siunissami iluaqutigilersinnaagigut, kisianni erseqqissaatigeqqillara, matumani oqaatigisara assersuutaannaavoq, naalakkersuisut siulittaasuat Kim Kielsen (S) Sermitsiaq.AG-mut oqarpoq.