Naalakkersuisooqatigiilersut
Kielsen: Inuit piukkunnartut toqqarpakka
Siumup siulittaasuata aamma Naalakkersuisunut siulittaasunngortussap Kim Kielsenip naalakkersuisutut ivertinneqartussat pingasunngornermi tamanut nalunaarutigai, tamannalu Siumup ataatsimiittarfiani pivoq. Inuttaalu qulanngilaq
Inatsisartunut qinersisoqarneraniit ullut aqqaneq marluk qaangiuttullu kiisalu naalakkersuisooqatigiinnissamut isumaqatigiissutip atsiorneqarneranit ullut arfinillit qaangiuttullu naalakkersuisuni ilaasortanngortussat qulingiluat, Naalakkersuisut siulittaasussaannit Kim Kielsenimit ilisaritinneqarput.
- Piukkunnarnersiorlugit toqqaavunga. Naalakkersuisooqatigiit isumaqatigiissutaata piviusunngortinnissaannut ullut 100-t eqqissilluta sulinissarput tullinnguuppoq, Kim Kielsen tusagassiortunut katersortitsinermi oqarpoq.
Atuaruk: Pisortatigoortoq: Aajuku Naalakkersuisunngortut
Qujaukitsoq naalakkersuisunngoqqippoq
Aningaasaqarnermut naalakkersuisuusimasoq Vittus Qujaukitsoq, Siumut, Inatsisartunut novemberip 28-ani 2014-imi qinersinermi qinigaanngitsoorpoq. Taamaakkaluartorli nunanut allanut, inuussutissarsiornermut, suliffeqarnermut niuernermullu naalakkersuisussatut Kim Kielsenip toqqarpaa.
- Inatsisartunut ilaasortaanngitsunik aallernissannut pisinnaatitaaffeqarpunga, taannalu suliassamut piukkunnarnerpaatut nalilerlugu toqqarpara qularinngilaralu suliassaq sapissanngikkaa, erseqqissaavoq.
Atuaruk: Inatsisartut tallimanngorpat inissititissapput
Aalisarnermut naalakkersuisunngortoq katersuuffiorusuppoq
Inatsisartunut ilaasortaq Siumumeersoq Karl-Kristian Kruse aalisarnermut, piniarnermut nunalerinermullu naalakkersuisunngussaaq. Ilulissanit Upernaviup tungaanut killeqanngitsumik qaleralinniarsinnaanermik siunnersuusiortuusimavoq, siunnersuutaalu aalisarnermut attuumassutillit akornanni aalassatsitsisimaqaaq. Piujuaannartitsinerup qatangiinnartinneqarsinnaanera aalisarnermik suliallit ernummatigisimavaat, pingaartumik nunani tamalaani piujuaannartitsinermik meqqip qularnaveeqqutaasup pissarsiariniarlugu suliniuteqarnerup iluatsinngitsoorsinnaanera ernumassutigineqarmat.
- Aalisarnermik sulialinnut tamanut katersuuffiunissara soorunami tamaviaarlunga sulissutigissavara, Karl-Kristian Kruse neriorsuivoq.
Atuaruk: Siumut, Atassut aamma Demokraatit naalakkersuisunngortitsipput
Doris Folketingimit sulinngiffeqassaaq
Folketingimi ilaasortaq Siumumeersoq Doris Jakobsen Folketingimit sulinngiffeqarniarpoq.
- Peqqissutsimut nunanillu avannarlernik suleqateqarnermut naalakkersuisunngorusunnerlunga aperineqarama tulluusimaarutigaara, peqqinnissaq pillugu suliniutit pingaartitaraakka sulinissannullu piareersimavunga, Doris Jakobsen erseqqissaavoq.
Ilinniartitaanermut ilageeqarnermullu naalakkersuisuusimasup Nick Nielsenip Doris Jakobsen Folketingimi kingoraassavaa. Nick Nielsen Doris Jakobsenimut sinniisussat siulliup tulleraa (Vittus Qujaukitsoq sinniisussaq siulliungaluarpoq, aaqq.).
Atuaruk: Aajuku Inatsisartunut qinigaasut nutaat