Kielsen illoqarfimmi isikkiviginnerpaat ilaanniikkunnaartoq
Naalakkersuisut Siulittaasuata Kim Kielsenip Nuummi Namminersorlutik Oqartussat allaffeqarfissuata qullerpaavani allaffini isikkivigissorsuaq qimalerpaa. Naalakkersuisoqarfiimmi arlallit allamut nutserput - tassunga ilanngullu Naalakkersuisut Siulittaasuata Naalakkersuisoqarfia.
Nutserisartut naalakkersuisoqarfiit allaffiini atortunik nutserillutik ataasinngormat ulappupput.
Sermitsiaq.AG-p paasisimasai naapertorlugit, Naalakkersuisut Siulittaasuata Naalakkersuisoqarfia allaffeqarfissuarmi aappaluttumi, Inatsisartut ataatsimiittarfianut atasumi 2. salimut nuuppoq. Tamatuma malitsigisaanik Aningaasaqarnermut Naalakkrsuisoqarfik 1. salimut nuussaaq.
Namminersorlutik Oqartussat allaffeqarfissuanni qullerpaaq pilerinaqisumik inissisimasoq Ilinniartitaanermut Naalakkersuisoqarfinngussaaq.
Naalakkersuisut amerlanerulersimasut
Namminersorlutik Oqartussani attaveqartarnermut pisortap Frederik Lundip Sermitsiaq.AG Naalakkersuisut Siulittaasuata Naalakkersuisoqarfianut saaffiginneqquaa, nutsernerit pillugit paasissutissanik piniassappat. Nutsertoqarnerali pissutigalugu Naalakkersuisut Siulittaasuata Naalakkersuisoqarfia ullumikkut matoqqasoq oqarasuaatinik nuutsisarfimmit ilisimatitsissutigineqarpoq.
Demokraatit naalakkesuisooqatigiinnut ilanngummata nutsernissaq pisariaqalersimarpasippoq, tamatumami malitsigisaanik naalakkersuisut arfineq-marlunniit qulinut amerlineqarnikuupput.