Kielsen, Heilmann aamma Qujaukitsoq ataatsimiititaliassarsuarmik kinguarsaapput
Partiit, ikinnerussuteqarlutik naalakkersuisooqatigiinnut aningaasanut inatsit pillugu isumaqatigiissuteqarsimasut, suli utaqqisinnaassuseqartariaqassapput, sulimi aalisarnermut ataatsimiititaliassarsuup sulinermini najoqqutassaa naammassineqanngilaq
Partiit tamarmik aningaasanut inatsit pillugu isumaqatigiissuteqartut, Siumut, Atassut, Demokraatit og Inuit Ataqatigiit qilanaarnerup pianik nuannaarput, tassami kiisami aalisarnermi atugassarititaasussat saqitsaassutaaqisut aaqqiiviginiarlugit pimoorussamik aalisarnermut inatsit aammalu aalisarneq pillugu suliassaqarfimmi pilersaarummik sulisoqalissammat.
Siunertaagaluarpoq aningaasanut inatsit inaarutaasumik akuersissutigineqarniariartoq ingerlannaq aalisarnermut ataatsimiititaliarsuanngortussap sulinermini najoqqutassaa naammassineqassasoq aammalu ataatsimiititaliarsuaq inuttalersorneqareerluni suliassaminik aallartitsissasoq.
Ullumikkut februarimiippugut, manna tikillugu suli ataatsimiititaliarsuanngortussap sulinissaminut najoqqutassaa naammassineqanngilaq aammalumi ataatsimiititaliarsuaq suli pilersinneqanngilaq.
Aviisi Sermitsiaq taama allaaserisaqarpoq.
Aalisarnermut, piniarnermut nunalerinermullu naalakkersuisoqarfik Sermitsiamut ilisimatitsivoq, aalisarnermut ataatsimiititaliarsuanngortussap sulinermini najoqqutassaatut missiliut Naalakkersuisunut nassiunneqarsimasoq, Naalakkersuisoqatigiillu siuttuisa oqaluuserinnereernissaat utaqqineqartoq.
IA-mi siulittaasup Múte Bourup Egedep tamanna nalunaarut isornartorsiorpaa. Sermitsiami tamanna paasisaqarfiginerusinnaava, taanna uani ataani linki aqqutigalugu isissutissarsiffigisinnaavat: