Politikki
Kielsen Dorphip isornartorsiornera pillugu: Eqqunngitsumik oqalupputit
Borgmester Ole Dorph Naalakkersuisut siulittaasuannut Kim Kielsenimut isornartorsiuinikuuvoq, ineriartortitsinermullu kigaallassaanerarlugu aaqqissuusseqqinnissamullu pilersaaruteqannginnerarlugu. Kielsen maanna akissuteqarpoq.
- Isornartorsiorneq inissaminiikkaangat akuerisarpara. Kukkusumimmi iliorsimagaanni aalajangersimagaanniluunniit tamanna nassuerutigisariaqarpoq iliuuseqarfigineqarlunilu. Kisianni Sermitsiaq normu 9 atuarakku assut tupaallappunga. Qaasuitsup Kommuniani borgmesterip Ole Dorphip Naalakkersuisut ineriartornermik unitsitsinerarpai aaqqissuusseqqinnissanullu pilersaaruteqannginnerarlugit, Kim Kielsen aaqqissusoqarfimmut ilanngutassiami nassiussamini allappoq.
Aaqqissuusseqqinnissamut pilersaarutit Inatsisartunut tamanut suliassaapput
Randi V. Evaldsenimut siornatigut akissuteqarnermini aaqqissuusseqqinnernut pilersaarutit paragraf 37-imi apeqqummi saqqummiunneqannginnissaat oqaatigisimallugu, Kim Kielsen ilisimatitsivoq, taakku Inatsisartunut tamanut saqqummiunneqarnissaa eqqortuunerarpaa.
- Tamanna Randi V. Evaldsenimut erseqqissaassutigineqarpoq ilanngullugulu susassaqarfinni sorlerni aaqqissuusseqqittoqarnissaanik siunnersuuteqassamaarnitsinnik nassuiaateqarlunga. Paasinarporli nalunngisassaminnik arlallit eqqaamannissimanngimmata, soorlu Ole Dorphitut. Tupaallaatigaara Ole Dorphimi Naalakkersuisunut Inatsisartunullu ilaasortaanikuuvoq, Kim Kielsen allappoq.
''Sooq asuli oqaluttoqassava?''
Illoqarfiup mittarfiata tallineqarnissaa Naalakkersuisunit kigaallatsinneqarneranut borgmesterip isumaqarneranut Kim Kielsen ima oqarpoq:
- Sooq asuli oqaluttoqassava? Naalakkersuisut 2015-imi pisinnaatinneqarput Ilulissani mittarfik nunanut tamalaanut naleqqussagaq sananeqassasoq. Tamanna nalornissutigigaanni aviisimi tassani, Sermitsiaq normu 9-mi quppernermi 55-imi, quppernermik ilivitsumik annoncemi atuarneqarsinnaavoq Kalaallit Airport A/S siunnersortissarsiortoq mittarfissat illutassaasalu pilersaarusiornissaannik suliaqartussamik. Misissueqqaarnerit aallartereerput. Taakku erseqqilluinnartumik uppernarsaataapput Ilulissani, Nuummi Qaqortumilu mittarfissat pivisusunngulernerannut.
Piviusorsiunngitsoq
Kim Kielsenip Dorphip isornartorsiorneranut akissutini ima naggaserpaa:
- Ole Dorphip isornartorsiornera inissaminiinnanilu piviusorsiunngitsutut isigaara. Ole Dorphip isornartorsiornera nammineq mittarfimmut suliniutigisimasami piviusunngunngitsoorsimaneranut naammagittaalliutaanerusoraara. Ole Dorphili isumaqatigaara oqarmat, aningaasarsiornikkut siuarsaanissamut suliffissanillu pilersitsinissanut takornariaqarnermik, aalisarnermik aatsitassarsiornermillu inuussutissarsiutinik inerisaanissanut mittarfiliornerit politikkikkut suliniutini pingaarnerit ilagigaat.
Angallannikkut pitsaanerusumik aaqqissuussinikkut takornariat amerlanerulerlutillu inuussutissarsiornikkut pissanganaatilinnik periarfissiisoqassasoq, Kim Kielsenip naqissuserpaa.
- Ole Dorphip uggoraa Ilulissani mittarfik borgmesteriunermi nalaani sanaartorneqassanngimmat. Kisianni eqqaamasariaqarpaa Naalakkersuisut tamakkiisumik isiginnittussaammata. Naalakkersuisut nuna tamakkerlugu innuttaasunullu tamanut iluaqutaasussanik aaqqiissutissarsinissaq anguniarpaat.