Skip to main content

Kielsen akersuunnermi ajugaavoq, taava susoqassava?

Qinersinermi allamik aamma qinersisoqarpoq: Siumumi kina taaguunneqarnerpaassava? Tamannalu qanoq paasisariaqarpa?

Ullaaralaarli paasinarsivoq Siumumut qinersisartut Kim Kielsenimik nuannarinninnerusut.

Qinersinermut ataatsimiititaliap naatsorsuisimanera malillugu Kielsen inuttut 1.841-nik taaguunneqarsimavoq. Erik Jensen 1.186-inik taaguunneqarsimalluni. Tassa Kielsen 655-inik taaguunneqarnerusimalluni.

Apeqqutaalersoq tassaavoq, taamatut inerneqarnerata malitsigisaanik Siumup partiiani kina aqutsilluarsinnaanerunersoq pillugu eqqarsaasersuuteqartoqarlunilu pissaaneqarniuttoqaqqilissanersoq. Siumumili siulersuisuunerit Erik Jensenilluunniit taamatut pisoqarsinnaanera eqqarsaatigisimanngilaat.

– Siumut siulittaasuattut atuutiinnassaanga, Erik Jensen KNR-ip partiit siulittaasuinik naggataasumik oqallitsitsinerani erseqqissaavoq, tassani aamma Kielsen taaguulluarneqarsimaneranik pilluaqquaa.

Erik Jensen siulittaasutut atuutiinnaraluartoq, Múte B. Egedep ulluni aggersuni partiinik allanik oqaloqateqarnissaanut Siumut sinnerlugu kina takkutissanersoq erseqqissumik suli paasineqanngilaq.

Qinersisoqarnissaa sioqqullugu Erik Jensenip Kim Kielsenillu oqaatigitsiarsimavaat, Siumumi qinigassanngortittoq taaguunneqarnerpaasimasoq qinersisoqareerpat partiip isumaqatiginninniarnerani aquttuusariaqartoq.

Qinigaalluartoq nutaaq

Siumup qinigaalluarneranut ilaatigut pissutaasut ilagaat, Kim Kielsenip Ilulissani inuttut taaguunneqarluarsimanera, Iluliarmiut atlantikukkoortaatinut mittarfittaarnerminnut tamanna qujassutigisimarpasippaat.

Aamma Siumut qinigaalluarneranut pissutaasoq alla tassaavoq, siullermeerluni qinigassanngortittup Aslak Vilhelm Jensenip inuttut 814-inik taaguunneqarsimanera. Qarsoq Høegh-Dam aamma taaguunneqarluarsimavoq, soorlu aamma Vivian Motzfeldt ukiuni pingasuni kingullerni Inatsisartut siulittaasuattut atuussimanini pillugu qinersisartunit akuerineqarsimasoq.

Inatsisartut inissititerneqarpata atuuffimmik tigumminniinnarnissaa ilimanarpallaanngilaq. IA-mi polikkeritoqaq Mimi Karlsern aamma Naleqqami siulittaasoq Hans Enoksen Inatsisartut siulittaasuattut inissinneqarsinnaapput.

Siumut Enoksenip qinersinermi matumani taaguulluarneqarsimanera atorsinnaasimagaluarpaa. Ukiorpaalunni Siumumi siulittaasuusimasoq 1.471-inik taaguunneqarnermigut qinigaalluartarnini naqissuseqqippaa.

Siuariarneq

Erik Jensenip partiimi siulittaasutut nutaatut qineqqusaanermilu aqutseqqaarsimasutut ingerlatsilluarsimavoq, tunuliaquttaminillu akuerisaasusut inissinneqassannguatsiarluni.

2018-imi qinersisoqarneranut sanilliullugu Siumut Inatsisartuni ataatsimik ilaqqillutik amerleriarput - tassa Inatsisartuni qulinik issiatitaqalerluni. Siumulli qinigaaffiup ingerlanerani ataatsimik ilaqqinnikuupput, tassa Henrik Fleischeri 2018-imi qinersisoqariitsiartoq Naleqqamiit Siumumut nuummat.

Qinersisartut taamatut iliorsimanera akuersaarnagu qineqqissimanngilaat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER