Pituffik

Kielsen aamma Qujaukitsoq: Uagut aalajangigassaraarput

Naalakkersuisut siulittaasuata Kim Kielsenip aamma nunanut allanut tunngasunut naalakkersuisup Vittus Qujaukitsup aalajangissavaat Pituffimmi sakkutooqarfimmi kiffartuussinissamut isumaqatigiissutissamik neqerooruteqartoqarnissaata tungaanut qanoq suleriaaseqartoqarsimaneranik misissuinerup inernera ingerlateqqinneqassanersoq

Naalakkersuisuni ilaasortaasut Siumumeersut - Vittus Qujaukitsoq aamma Kim Kielsen

Pituffimmi sakkutooqarfimmi kiffartuussinissamut isumaqatigiissutissamik neqerooruteqartoqarnissaata tungaanut Kalaallit Nunaanni qanoq pisoqarsimanersoq Naalakkersuisut 'sumulluunniit attuumassuteqanngitsumik' eqqartuussissuserisumik suliakkiipput. Misissuineq naammassippat suut paasineqarsimanersut misissuinermi suleqataasut 'nipangersimasussaatitaasussaapput'.

Allakkiami tassani eqqartuussissuserisup misissuinissaanut suliassat tamarmik allaaserineqarsimapput, kisianni Inatsisartunut aamma kikkunnut tamanut saqqummiunneqarnavianngillat.

Tamanna Naalakkersuisunut siulittaasup Kim Kielsenip Siumumeersup ilisimatitsissutigaa.

- Misissuinermi angusarineqartut Inuussutissarsiornermut, Suliffeqarnermut, Niuernermut Nunanullu Allanut Naalakkersuisumut uannullu saqqummiunneqarumaarput. Misissuinermi inerniliunneqartut innersuussutaasullu qanoq isillugit malitseqartinneqassanersut nammineerluta aalajangiiffigiumaarpagut, Kim Kielsen Inuit Ataqatigiinneersumut Sara Olsvigimut akissuteqaateqarpoq.

Saqqummiunneqarsinnaasoq
Eqqartuussissuserisup misissuinissaa pillugu Sara Olsvig arlaqartunik paragraf 37 naapertorlugu apeqquteqarpoq.

Pituffimmi sakkutooqarfimmi kiffartuussinissamut isumaqatigiissutissamik neqerooruteqartoqarnissaata tungaanut Kalaallit Nunaanni qanoq pisoqarsimanersoq ilisarisimasatoqqap Ole Spiermannip Københavnimi Bruun og Hjejle-meersoq misissuisuussaaq, tamanna AG-mi pingasunngormat allaaserineqarpoq.

Tamanna allakkiami AG-mit pissarsiarineqartumi takuneqarsinnaavoq, allakkiami tassani eqqartuussissuserisup misissuinissaanut suliassat tamarmik allaaserineqarsimapput.

- Taamaalillunga itigartinngilara misissuinermi malitassat angusarineqartulluunniit imaluunniit taakua ilaat Inatsisartunut nassiunneqarumaartut, soorlu apeqqutigineqartumi aammalu tamanut kingusinnerusukkut saqqummiussisoqarnissaa pillugu oqartoqarnerani taaneqartoq, Kim Kielsen Sara Olsvigimut ilisimatitsivoq.

Suliami misissuisussaq kinaanersoq aviisimi AG-mi pingasunngornermi saqqummersumi atuarneqarsinnaavoq. Suliami suut misissorneqartussaanersut pillugit aamma atuarneqarsinnaavoq, kiisalu suliaq sooq isertuunneqartussaatitaanersoq aamma atuarneqarsinnaalluni. Aviisi uani pisiariuk:

Powered by Labrador CMS