Ataatsimiinneq
Kielsen aamma Løkke Brexit pillugu ataatsimiittut
Statsministeri Lars Løkke Rasmussen aamma Naalakkersuisut Siulittaasuat Kim Kielsen Statsministeriami marlunngornermi ataatsimiipput, tassani sammisat arlallit oqaluuseraat.
- Pissarsinartumik ataatsimiilluarpugut Danmarkimi Kalaallit Nunaannilu naalakkersuinikkut aningaasaqarnikkullu killifiit ilaatigut oqaluuseralutigit, ataatsimut tusagassiuutinut nalunaaruteqarnerminni oqarput.
- Nunanut Allanut tunngasutigut Danmark Kalaallit Nunaallu suleqatigiilluarput. Ataatsimiinnermi pisut takkuttussallu killiffissiorneqarput, ilanngullugu Brexit pissutigalugu EU-p aningaasarsiornikkut atugassarititaasa isumaqatiginninniutigineqalerpata unammilligassat ataatsimoorussagut oqaluuserineqarluni. Tuluit Nunaata EU-mit aninera Kalaallit Nunaannut annertuumik aamma sunniuteqassaaq.
- Suleqatigiissutigisagut allat aamma oqaloqatigiissutigaavut. Assersuutigalugu Kalaallit Nunaanni upalungarsimanermut avatangiisinullu tunngatillugu iliuuserineqartut.
- Kalaallit Nunaanni suliassanik pingaarutilinnik arlalinnik naalagaaffik suli isumaginnittuuvoq. Taamaammat suliassaqarfiit taakku pissarsinartumik pitsaasumillu suleqatigiigiissutigineqarnerisa ingerlatiinnarnissaat Danmarkimi Kalaallit Nunaannilu naalakkersuisut ataatsimoorlutik kissaatigaat.
- Danmarkimi Kalaallit Nunaannilu oqartussat suliassaminnik ukiorpassuarni ileqqoralugu suleqatigiittarsimanerisa ingerlatiinnarnissaat inerisartuarnissaallu aamma kissaatigaarput, tusagassiuutinut nalunaarut taama naggaserneqarpoq.
Kim Kielsen Københavnimiinnermini sisamanngorpat kalaallit aallartitaqarfianni ukiortaami ilassinninnermut peqataassaaq.