Skip to main content

Kielsen: 2016 meeqqat ukiorissavaat

– Persuttaasarnertigut kinguaassiuutitigullu atornerluisarnitsigut nuanniitsumik rekordeqarpugut. Tamanna akuersaarneqarsinnaanngilaq, Naalakkersuisut siulittaasuat Kim Kielsen ukiortaami oqalugiarnermini oqarpoq

Naalakkersuisut siulittaasuata Kim Kielsenip (S), januaarip aallaqqaataani ukiortaami oqalugiarnermini meeqqat atugarisaat ilanngullugit eqqaavai.

– Ukioq manna nunami maani Danmarkimilu meeqqat atugarisaat sammineqalerput. Meeqqat sernissortuuvakka, taamaattumillu aalajangerpunga ukioq 2016 meeqqat ukiorissagaat, Naalakkersuisullu tamanna sammisarissagaat, Naalakkersuisut siulittaasuat oqarpoq.

Atornerluisarneq anigoruminaatsoq

Tamatumunnga atatillugu erseqqissaatigaa Namminersorlutik Oqarttussat meeqqanik sumiginnaasarnerit kinguaassiuutitigullu atornerluisarnerit pitsaaliorniarlugit ullumikkut suliniuteqareersut, ilaatigut meeqqat tamaasa pisinnaatitaaffiinik ilinniartillugit, sulisunik ilinniartitseqqilluni aammalu katsorsarneqarnissamut siunnersorneqarnissamullu periarfissat nukittorsarlugit. Suliniutilli tamakkua meeqqanik sumiginnaasarneq kinguaassiuutitigullu atornerluisarneq unitsissinnaasimanngilaat.

Qanoq iliuuseqartariaqalerpugut

– Inuiattut qanoq iliuuseqartariaqalerpugut. Persuttaanikkut kinguaassiuutitigullu atornerluinikkut nuanniitsumik rekordeqarpugut. Akuersaarneqarsinnaanngilaq meeqqatsinnik allallu meeraannik kannguttaatsuliortarnerput. Immitsinnut ikiussaagut paaralutalu, kannguttaatsuliortoqannginnissaalu paaralugu. Nunatsinni pisuussutit pingaarnersarinngilaat aatsitassat uulialuunniit. Uagut inuit pingaarnersaavugut, Kim Kielsen erseqqissaavoq.

– Meerartavut sammisassavagut, paaralugit, isumagalugulu angajoqqaatut ilinniartitsisutullu meerartatta meeraanerminni pitsaasumik atugaqarnissaat, aalajaatsumik perorsarlugit pitsaasumillu ilinniagaqartillugit. Tamatta immitsinnut pitsaanerulaartumik paarinialaartuugutta nammineq inuttut, nunattalu inuiattullu namminersulernissarput qanilleriarujussuassagaluarput, Naalakkersuisut siulittaasuat oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER