Nuuk
Kiannermut rekordi nutaaq
Sisamanngormat Kalaallit Nunaanni juunimi aatsaat taama kiatsigisoq uuttorneqarpoq
Sisamanngormat nunatsinni juunimi aatsaat taama kiatsigisoq uuttorneqarpoq. Kiassutsimik rekordi nutaaq Nuummi mittarfimmi uuttorneqarpoq, tassani 24,7°C-mik kiatsigisoq uuttorneqarmat. Taamatut paasissutissiivoq seniorklimatolog Kalaallit Nunaannullu immikkut ilisimasalik DMI-meersoq John Cappelen.
Nunasarneq
– Tunup avannaani naqitsinertuffeqarsimavoq kujataanilu naqitsinikiffeqarsimalluni. Tamanna Nuummi nunasarnertitsivoq, Kujataani qaqqanit nunasarneq Nuummut pisimalluni. Silasiortut oqarput nunasarneq kissartorujussuullunilu panertuusoq. Silaannaq tamanna 24,7°C-mik kiatsitsivoq, DMI.dk naapertorlugu John Cappelen nassuiaavoq.
1958-imiilli
Juunimi kianneranik rekordi kingulleq pivoq Kangerlussuarmi 2014-imi juunip15-ianni, taamanikkut 23,2°C-mik kiammat. Nunatsinni kiassutsimik rekordinut paasissutissat 1958-imiilli katersorneqartalersimapput.
DMI-p Kalaallit Nunaannut malinnaasoqarfia naapertorlugu tallimanngormat 24,7°C qaangerlugit kiassuseqarnissaanut periarfissaqarsimavoq. Tallimanngornermulli paasissutsissat qularnaassusiat silasiortunit aatsaat ataasinngormat qulakkeerniarneqarput.