Kavaajat sungaartut Qaqortumi takussaaqilersut

Tulukkat Sungaartit peqatigiffiuvoq namminersortoq, taakkua soorlu natteravn-itut illoqarfimmi toqqissisimatitsiniarlutik unnukkut pisuttuartarput. Maanna Qaqortumi pisuttuartarnertik ullumi tallimanngornermi aallarteqqilerpaat.

Illoqarfimmi toqqissisimatitsiniarlutik nammineq kajumissutsiminnik pisuttuartartut aasaanerani uninngareerlutik maanna aallarteqqilerput.

- Aallarteqqaaratta meeqqat takugaangamitigut qimaasarput. Qaqortumi aserorterineq annertugami. Kisianni meeqqat ilai aggertarput oqaloqatigilaarlutalu, Tulukkat Sungaartit ilaai, Anguteeraq Høegh Olsen oqarpoq.

Qaqortumi Kommune Kujallermi pitsaaliuinermut immikkoortortaqarfik pitsaaliuinermullu ataatsimiititaliaq suleqatigiillutik unnuarissat Tulukkat Sungaartit oktobarimi 2020-mi pilersippaat. Siullermik siunnertaasimagaluarpoq illoqarfimmi angalaassagaanngamik ikinnerpaamik pingasuusarnissaat, maanna marluinnaallutik angalasalernissaat aalajangiunneqarpoq, pisoqataasussaq pingajuat amerlanertigut uniinnartarmat.

- Siunnersuutigaara inuit marluinnaallutik pisuttuarsinnaalertariaqartut ullutsinnimi aamma oqarasuaatit periarfissaapput arlaatigut susoqassagaluarpat. Aamma isumaqarput amerlanerit taamaasillutik kajuminnerulissasut peqataasalernissaminnut. Pingajussamik utaqqisarneq taamaasilluni aamma pisariaarussaaq, Anguteeraq Høegh Olsen oqarpoq.

Nammineq kajumissutsiminnik suleqataarusuttut

Tulukkat Sungaartit pitsaaliuinermi immikkoortortaqarfiup allaffiani unnugu arfineq-marlunut naapissapput, tassani soqutiginnittut tamarmik tikilluaqqusaapput.

- Nammineq kajumissutsiminnik pisuttuartartut sungaartunik nasanillu tapiiffigineqarnikuupput. Nammineq kajumissusiminnik takkuttartut taama soqutiginnitsiginerat takullugu nuanneqaaq. Taakkummi illoqarfimmi toqqissisimatitsisinnaapput meeqqanullu aamma eqqissisimatitsillutik, Pitsaaliuinermik Immikkoortortaqarfimmi pisortaq, Helga Nielsen oqarpoq.

Maanna angalaartartut katillugit 12-iupput. Taakkua namminneerlutik sianerfigeqatigiinnerminni qaqugu pisuttuassanerlutik aalajangersinnaavaat.

- Angalaartartut namminneq qaqugu pisuttuassanerlutik aalajangersinnaavaat. Namminneq iluminni isumaqatigiissutigisarpaat. Taamaasilluta immaqa aamma eqimattat amerlanerit illoqarfiup sumiiffiini assigiinngitsuni pisuttuartoqarsinnaasassaaq, Anguteeraq Høegh Olsen oqarpoq.

Meeqqanik pinerliisimannginnermut uppernarsaat

Tulukkat Sungaartini angalaartartut tamarmik meeqqanik pinerliisimannginnermut uppernarsaateqarput, angalaartalerusukkaani uppernarsaat piumasaqaataasoq, pitsaaliuinermik immikkoortortaqarfiup paasissutissiissutigaa.

- Erseqqissaassutigerusuppara Tulukkat Sungaartini namminneq kajumissutsiminnik peqataarusuttut tamarmik meeqqanik pinerliisimannginnermut uppernarsaateqartariaqarmata. Tassunga tunngatillugu paatsoornerit allaqarput, Helga Nielsen oqarpoq.

Tulukkar Sungaartit oktobarimi siorna aallartinneqarput, siullermik namminneq kajumissutsiminnik peqataasussat amigaataasarsimapput. Pitsaaliuinermillu immikkoortortaqarfiup namminneq kajumitsiminnik angalaartartoqalernissaanut sulissutigisimavaa. Maannalu marlukkaarluni angalaarneq pingasuniit pitsaanerusoq paasineqarpoq.

Powered by Labrador CMS