Katuaq pisortassaqalerpoq
37-nik ukiulik Ivaaq Kriegel nunatsinni kulturikkut sullissiviit annerpaartaasa ilaannut - Nuummi Katuamut - siuttunngortussanngorpoq. Taama siulersuisut tusagassiuutitigut nalunaarummi paasissutissiipput. Pisortanngortoq septembarip aallaqqaani sulilissaaq.
Ivaaq Kriegel Ilisimatusarfimmit ilinniartitsisutut bacehloriuvoq kiisalu assassornermut ilusilersuisarnermullu ilinniartitsisutut ilinniagaqarsimasuulluni. Aalborgip universitetiani ilinniarsimasaminik paasissutissiisarnermik, attaveqatigiittarnermik aamma teknologiimik masteriuvoq.
Maannalu Nuummi kulturimik sullissivimmi Katuami siuttuusussanngorpoq. Arnakkuluk Jo Kleist, ukiuni kingullerni tallimani pisortaasimasoq kingoraassavaa.
Pisortanngortoq sunngiffimmi piniartartut peqatigiiffianni NTPAP-imi siulersuisunut ilaasortaavoq aamma pinialunnermik aalisarnermillu ingerlataqarluartuunermi saniatigut kalaaliminernik assiliinermillu nuannarisaqarluartuulluni.
- Nuannaarutigeqaara tulluusimaarutigalugulu Katuami pisortatut atorfinittussanngorama. Eqqumiitsuliorneq kulturilu assut nuannarisaraakka aamma Ilisimatusarfimmi studieadjunktitut atorfinni ilinniartitsissutigisarlugit, taanna oqarpoq.
Nunatsinnut siammaanerorusuttoq
Ivaaq neriuppoq, kommunit aamma Naalakkersuisut piffissami aggersumi suleqatigiinnermut nutaamik isumaqatigiissuteqarfigissallugit. Aamma neriuppoq kommunit allat suleqatigalugit kulturimik nunatsinnut tamarmut siammaasinnaalissalluni.
Siulersuisut siulittaasuata Juuaka Lyberthip erseqqissaatigaa pisortanngortussaq Kalaallit Nunaanni nalitsinni eqqumiitsuliornermik kulturimillu ilisimasaqarluartuusoq, aamma nittartakkat inuit attaveqatigiittarfii aqqutigalugu attaveqaqatiginninneq pikkoriffigigaa.
Siulersuisut kulturikkut illorsuarmut periusissiaq nutaaq Katuami sulisut, pilersitsisut, atuisartut aningaaasaliisartullu suleqatigalugit suliarileruttorpaat, suliarlu tamanna pisortanngortussap naammassinissaanut malittarissavaa.
- Siulersuisut isumaqarput Ivaaq Kriegel suliassamut tassunga siuttunngortissallugu piukkunnarluinnartuusoq, soorunalumi Ivaaq Kriegelip akisussaaffigissavaa Katuap ulluinnarni ingerlanneqarnera.