Nuuk
Katuap ukioq manna tusarnaartitsineq kingulleq taamaatiinnartariaqaraa
Akuersissummik amigaateqarnerup kinguneraa, kulturip illorsuata nipilersoqatigiit pingasut tusarnaartitsinissaasa taamaatiinnartariaqarnera
Kulturip illorsuata Katuap aalajangiuppaa, ukioq manna tusarnaartitsineq kingulleq Rockstones, Don Maliko aamma Sussat nipilersortoralugit decembarip 30-ni pisussaq taamaatinneqassasoq - taamatullu meeqqanut taakku nipilersortoralugit tusarnaartitsineq taamaatillugu.
Ammasinnaanermut killissaq
Tusarnaartitsinissamut ullut marluinnanngortullu pilersaarutaareersunut allannguisoqarnera pillugu taamaatinneqarput.
- Kommunimiit ammasinnaatsitaanermut killiutinneqartoq kukkusumik akuersissut tunniunneqarsimasoq Katuaq ilisimatinneqarpoq, tamatumalu kingunerissavaa nalunaaqutaq 24.00 kingorna Katuap ammasinnaannginnera, pisortaq Julia Pars tusagassiuutinut nalunaarummini ilisimatitsivoq.
- Taamaalilluta tusarnaartitsinissat pilersaarutaasimasut piviusunngortissinnaanngilagut, ullormullu allamut tusarnaartitsinissat kinguartittariaqarlugit, ilanngullugu oqarpoq.
Utertitsineq
Isissutissat Katuap saaffiginnittarfianut utertinneqarsinnaapput.
Kulturip illorsua tusarnaariartussarpassuugaluit pakatsisinnerannut ajusaaruteqarpoq, tusarnaartitsinissaq 2016-mi aaqqissuunneqarnissaa sulissutiginiarpaat.
Atuaruk: Katuaq tapiissutinik ikinnerusunik tunineqarsimasup amigartoornini naammagisimaarpaa