Katuami ukioq manna tusarnaartitsineq kingulleq

Uummat Da Bartali Crew-ikkullu aqagu appisimaalerunik tupaallatsitsillattaassallutik neriorsuipput.

Tupaallatsitsinissamik neriorsuineq Da Bartali Crewimi pinngortitsisuata Hans Ole Amossenip ukioq manna Kalaallit Nunaanni siullerpaalluni eventteknikeritut ilinniakkani naammassinera nipilersoqatigiillu Uummammi erinniortuat, taalliortuat, erinarsortuallu Jenseeraq Olsenip eventteknikeritut ilinniarnini aasaru naammasisussaaneranit pissuteqarpoq.

Atuaruk: Assit videolu takukkit: Tivolimi naapeqatigiinneq aallartilluaqaaq

Taamaammat nipilersornerinnakkut takutitsisoqarani qulliit atorlugit alutorsartitsinissaq aamma siunertarineqarluni.

Meeqqanut tulluarsakkamik nalunaaqutaq sisamanut tusarnaartitsisoqariarluni inersimasunut unnukkut qulinut aallartittumik tusarnaartitsisoqassaaq.

Uummat ukioq 2009-mi Aasiaat Ilinniarnertuunngorniarfiani aallartipput. 2010-mi nuuteeraq siulleq saqqummerpoq ateqarluni ”Tusaannga” 2011-mi nuuteeraq aappassaat saqqummerpoq, ”Toornat Akornanni”.

Da Bartali Crew siullermik aallartisarneqarpoq 2012-imi. Nipilersortariaatsit appisimaartagaat Electro house, hiphop taavalu ambient music aallaavigalugit nammineq nipilersortariaasertik nassaarisimavaat.