Katuami qitilluni nuannisarneq
Qiajuk arfininngormat qitinnermik killinnartumik takutitsivoq, tassani meeqqat inuusuttuaqqallu 180-it nuannaaqalutik kusanarluinnartumik takutitsillutik
Qitilluni isiginnaagassiaq Qitik ukiumiit ukiumut ineriartortinneqartoq takuneqarsinnaasarpoq. Qitik tassaavoq qitinnermik ilinniarfiup Qiajuup ukiumoortumik takutitsisarnera, tamatumalu peqatigisaanik ukiuunerani ilinniartitsinermut naggataarutaasarluni. Qitinnermik ilinniartitsisartut arlallit, Ruth aamma Alexander Montgomery-Andersen siuttoralugit ukiup ingerlanerani meeqqat inuusuttuaqqallu qitinnermik pitsaanerpaamik takutitsinissaannut kajumissuseqalersinneqartarput.
Ineriartorneq soqutiginartoq
Takutitsineq marlunnut immikkoortinneqarsimavoq, siullermi pingaarnerusumik qitinnermik ilinniartut nukarliit takutitsillutik aamma takutitsinerit aappaanni qitinnermik ilinniartut angajulliit takutitsillutik. Qitittartunut malinnaalaarsimagaanni aamma Qitik ukiuni arlalinni isiginnaartarsimagaanni, ukiumiit ukiumut qanoq ineriartortoqartigisimanera takullugu soqutiginartuuvoq. Qitittartut arlariit Qiajummi ukiuni arlalinni qitittartuusimapput, taakkulu ilarpassuisa qaffasilluinnartumut anngukkiartuaarnerat angusaavoq kusanartoq.
Anguniakkat tamatigoortut
Ukiut tamaasa qitinnermik takutitsisoqartarneratigut, qitittartut aamma periarfissinneqartarput qiteriaatsit sorliit Qiajummi qitinneqartarnerisa takunissaannut. Soorlumi aamma inuusuttuaqqat qitittartut angajulliunerusut qitinnerat takusinnaasarpaat, taamaalillutillu maligassaqalersarlutik taamalu anguniagassaqalersarlutik. Qiteriaatsillumi tamatiguussusiat aamma takuneqarsinnaasarpoq, takutitsinernimi qitinneqarmata ballet, jazz, qiteriaatsit nutaat aamma urban style dans. Taamaattumik qitinnerni qangatoortumik qitittoqartarlunilu aamma nutaaliaanerusumik takutitsinernut tunngasunik qitittoqartarluni.
Qitinnermik ilinniarfik alliartortoq
Qitinnermut ilinniarfiup ukioq manna ukiut arfinilissaannik qitinnermik takutitsinera qanoq nuannarineqartigineranut aamma uppernarsaataavoq. Qitittartut ukiumiit ukiumut amerleriartarput. Assersuutigalugu 2014-imi qitittartut taamaallaat 55-it takutitseqataapput, arfininngormalli qitittartut 180-it takutitseqataallutik. Qitittartut ukiutik aamma inuiaassutsitik tunuliaquttatillu akimorlugit qitinnerup nuannersua naapeqatigiiffigisinnaagaat takullugu nuanneqaaq. Qiajuk Studiosip qanittukkut aamma aallartippai drop-in-salsa aamma inersimasunut yoga. Taakkuli sapaatip-akunnerata naanerani takutitsinermi ilaatinneqanngillat.
Qitittartut aasaanerani sunngiffeqalersut
Qitittartut tamarmik arfininngormat takutitsinerup kingorna qitinnermik atuartinneqarnerminnit aasaanerani sunngiffeqarallassapput.
Ukiuunerani ilinniartitsinissaq aggustip qiteqqunnerani sammisaqartitsilluni aallarteqqinneqassaaq. Tamatuma kingorna nalinginnaasumik qitinnermik ilinniartitsineq piffissani aalajangersimasuni ingerlanneqartalissaaq.
Ilinnialerusuttut aasap ingerlanerani Qiajuup Facebookimi quppernerani isumagineqartassapput, maannalu ilinniartinneqartartut nutaamik aamma nalunaartussaagamik eqqaamassavaat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...