Kattuffik: Ilinniartitsisut uumisaarneqarlutillu persuttarneqartarput
Kattuffimmit ilinniartitsisut imminut illersornissamut pikkorissartinneqarnissaat kissaatigineqarpoq. Ilinniartitsisulli perorsaasinnaassusertik pingaarnertut illersuutigisinnaasariaqaraat, atuarfimmi pisortamit oqaatigineqarpoq.
Ilinniartitsisut kattuffianit IMAK-imit nunami kommuni iliuuseqaqquneqarput. Ilinniartitsisut kattuffianit oqaatigineqarpoq, atuartut sakkortuumik qisuariartartut ajornartorsiutaasarnerat kommuninit iliuuseqarfigineqartariaqartoq, ilinniartitsisut kattuffiat ilinniartitsisunit qunusaarneqartarlutik oqaluttuartunit saaffiginnissutinik amerliartuinnartunik tigusaqartalersimammat:
- Atuartunit sakkortuumik qisuariartartunit qunusaarneqartutut misigisarput, ilaatigullu timimikkut uumisaarneqartarlutik, IMAK tusagassiorfinnut nalunaaruteqarluni allappoq.
- Klassimi atuarfiusumi atuartut qulit 26-llu akornanni amerlassuseqartut akornanni tamanna pisinnaasarpoq, ilinniartitsisup atuartut akunnerminni aaqqiagiinngissuteqarnerat ilinniartitsisumulluunniit kusanaattumik pissusilersornerat unitsinniartarpaa, IMAK-imi siulittaasoq Birthe Møller Therkildsen Sermitsiaq.AG-mut itisiliilluni oqarpoq.
Imminut illersornissamut pikkorissaasoqarnissaa siunnersuutigineqartoq
- Persuttaanerit qunusaarinerillu assigiinngitsorpassuartigut pisinnaapput. Isimmissaanerinnaanatillu annersitsinerinnaasanngillat, taanna ingerlaqqilluni oqarpoq.
Kattuffimmit taamatut pisoqartarnera kisitsisaatigineqanngilaq.
Kattuffik naapertorlugu ajornartorsiummut aaqqiissutaasinasut ilagaat, ilinniartitsisut imminut illersornissamut pikkorissarneqarnissaat, kattuffik naapertorlugu pikkorissaanikkut ilinniartitsisut ataasiakkaat pisunut peqqarniitsunut iliuuseqarnissamut sakkussaqartinneqalissasut.
IMAK 2017-imi taamatut assigusumik siunnersuuteqarsimavoq, siulittaasorli isumaqarpoq, peqqarniitsumik pisoqartarnera suli naammaginartumik iliuuseqarfigineqarsimanngitsoq.
Atuartunut ilinniartitsisunullu pissutsit pitsaanerulersissagai
- Atuarfimmi aqutsisup isumannaatsuunissaq akisussaaffigaa. Ilaasortat sulisullu sinniisaat uagutsinnut sianertartut qanoq iliuuseqarsinnaanngitsutut misigisimasarput, Birteh Møller Therkildsen oqarpoq.
Kattuffiup siulittaasuata erseqqissaassutigaa, siunnersuutigineqartoq aqqutigalugu ilinniartitsisut atuartullu isumannaassusaat pitsaanerulersinneqassasoq.
I Kommuneqarfik Sermersuumi aamma atuartut sakkortuumik kamattarnerat misigineqartarpoq. Meeqqanulli Atuarfeqarnermullu Ingerlatsivimmi pisortap Lone Nukaaraq Møllerip ilinniartitsisut imminut illersornissamut pikkorissartinneqarnissaannik isumaq imaaliinnaq taperserusunngilaa.
Pisortaq: Perorsaasinnaassuseqarneq imminnut illersornissamut pitsaanerpaavoq
- Ilinniartitsisut perorsaasinnaassusaat imminut illersornissamut pitsaanerpaallunilu sunniuteqarnerpaasariaqarpoq. Ilinniartitsisut namminneq pissusilersuutitik atorlugit persuttaasoqaranilu qunusaarinngikkaluarluni aaqqiagiinngissutigineqartut qanoq aaqqiiffigineqarsinnaanerat takutissinnaasariaqarpaat, taamaammat aaqqiagiinngissuteqarnermi iliuuseqarsinnaaneq anguniarlugu pikkorissartinneqarnissaat ornigivallaanngilara, pisortaq Sermitsiaq.AG-mut allakkatigut oqaaseqaateqarpoq.
Taassuma ilisimatitsissutigaa, atuartut peqqarniitsumik pissusilersortarnerannik ajornartorsiuteqartoqartoq kommunimit eqqumaffigineqartoq, aamma atuarfimmi persuttaasoqartarnerat akuersaarneqarsinnaanngilluinnarnera qularutigineqassanngitsoq oqaatigaa.
- Taamaammat ilinniartitsisut toqqissisimanartumik atugaqalersinneqarnissaannut IMAK suleqatigerusupparput, pisortaq oqarpoq, nangillunilu:
- Kommunit allat assigalugit atuartut peqqarniitsumik pissussilersortarnerat misigisarparput, taamaammat atuarfitsinni tamani upalungaarsimanissamut pilersaaruteqarpugut, taakku aqqutigalugit ilungersunartumik pisoqassappat inersimasut allat akuliutipallattarnissaat qulakkeerneqarsimavoq.