Kattuffik nalunaaruteqartoq: KNR-ip inissisimanera ernumanarpoq

Tusagassiortut kattuffiannit ernumanartinneqarpoq, KNR-ip sulisunik amigaateqarnini pissutigalugu radioaviisnik nittartakkatigullu nutaarsiassanik annikilliliisimanera.

KNR

Innuttaasunik kiffartuussivittut tusagassiorfik KNR nutaarsiassanik ikililiisariaqarsimavoq, KNR-ip Nutaarsiassaqartitsiviani atorfiit 20 procentit missaanniittut inuttaqanngimmata.

Nutaarsiassaqartitsivimmi pisortaq Alice Sørensen naapertorlugu, tusagassiorfimmi tusagassiortut assersuutigalugu Namminersorlutik Oqartussani qaffasinnerusunik aningaasarsiaqartitsisoqartarmat tusagassiortut suliffinnut allanut nuuttarsimapput.

Dansk Journalistforbundip, Kalaallit Nunaanni tusagassiortunut atatillugu aaqqissuisartup taamatut inissisimasoqarnera ernumanartutut oqaatigaa:

- Kalaallit Nunaanni innuttaasunik kiffartuussivittut tusagassiorfiup paasissutissiinermik tunniussaqartarnermik oqallitsitsisarnermillu inuiaqatigiinni oqartussaaqataanermut pingaaruteqartumik suliaqartussap nalunaarutigimmagu, tamakkunannga pingaarutilinnik innuttaasunut tunniussisinnaanani ernumanarpoq, kattuffik nittartakkamigut allappoq.

Tapiliuttagaq unitsikkallarneqarsimasoq

Nutaarsiassaqartitsivimmi pisortap pisortat isumaqatiginninniartarnerat pissutigalugu sulisussanik pilerisaariuminaatsitsinera sulisunillu attassiinnarniarnermik ajornartorsiuteqarnera oqaatigimmagu Kattuffimmit ilalerneqarpoq:

- Tassunga assersuutitut taaneqarsinnaavoq, KNR-imi aqutsisut nunap karsianit immikkut aningaasaliiissutinit sulisut aningaasarsiaannut immikkut tapiliuttakkamik tunniussisarnermik unitsitsigallarsimanerat pissutigalugu taamatut inississimasoqalersimanera. Namminersorlutik Oqartussat suliap ingerlateqqinneqarnissaanik aalajangiiniarneranni aningaasat tapiliuttakkat unitsikkallarneqarsimapput, kattuffik allappoq.

Kattuffimmit kaammattuutigineqarpoq, isumaqatiginninniariaatsit atuuttut malillugit "sulisut sulisitsisullu sulisussarsiornermi sulisunillu attassiinnarniarnermi ajornartorsiutaasut peqatigiillutik aaqqiissutissarsiutissagaat."

Partiip naalakkersuisuutitaqartup Inuit Ataqatigiit nalunaarutigisimavaat, ajornartorsiut tusagassiortunngorniartarnerup nukittorsarneqarneratigut aaqqiiffigineqarsinnaasoq.

Tusagassiorfimmi pisortaq mianersoqqusisoq

Tusagassiorfimmi Sermitsiaq.AG-mi pisortaanerup Christian Schultz-Lorentzenip ilinniartitaanerup nukittorsarniarneqarnera isumaqatigaa, KNR-imili pisortanit aningaasalersorneqartumi aningaasarsiaqartitineruniarneq isumaqatiginngilaa:

- KNR-imi tusagassiortut tusagassiorfinnit allanit qaffasinnerusumik aningaasarsiaqartinneqarnissaat isumaqanngilaq. KNR pisortat suliffeqarfiutigaat. Tusagassiorfiit namminersortut, soorlu kiffaanngissuseqarluni tusagassiorfiusut namminneq isaatitsisussaapput aningaasarsianillu qaffaanissamut akissaqanngitsut aamma eqqarsaatigineqartussaammata, pisortaaneq taamatut oqarsimavoq.

Powered by Labrador CMS