isorliunerusut
Kattuffiit: Atorfiit 600-t Nuummit nuunneqarnissaat piviusorpalaanngilaq
Borgmesterit Siumumeersut atorfiit 600-t Nuummit sinerissamut nuunneqarnissaannik siunnersuutaat atorfillit ilinniagartuullu kattuffiisa qularnartoqartippaat
Borgmesterit Siumumeersut Ole Dorphip, Jørgen Wæver Johansenip Hermann Berthelsenillu siunnersuutigisaattut pisortani atorfiit 600-t Nuummit sinerissamut nuunneqarnissaat ajornartorsiuteqanngitsoornavianngilaq.
Taamatut erseqqissaapput atorfillit kattuffiat AK aamma ilinniagartuut kattuffiat, Akademikernes Sammenslutning i Grønland (ASG), sulisullu ilarpassui, atorfitik attatiinnarniarlugut nooqataasariaqarsinnaasut, kattuffinnut takkununnga ilaasortaapput.
Ilaqutariit tamarmiusut
Kattuffiit siulittaasuisa maluginiarpaat nuuttussat 600-t sinneqarusussuassasut, tassa ilaqutaat aamma attorneqassammata.
– Ilaat qularnanngitsumik nuussinnaassapput. Inuulli ataasiinnaap nuutsinneqarnissaa pineqanngilaq. Pineqarput ilaqutariit tamarmiusut. Siunnersuummi inissaqarnissaat, atuarfimmi aammalu paaqqinnittarfinni inissaqarnersut aammalu aapparisaat suliffissaqarnersut taaneqarsimanngilaq, ASG-p siulittaasua Louise Tøt Sermitsiamut oqarpoq.
Atorfiit amerlanngitsut
AK aamma taamatut qisuariarpoq.
– Ersissutigineqarsinnaavoq amerlasuut Nuummit nuukkumassanngitsut. Inuimmi pineqartut namminneq inissiaqarput, ilaqutaqarlutik, ikinnguteqarlutik ilisarisimasaqarlutillu. Taavalu qularnanngivinngilaq atorfillit aapparisaat illoqarfimmi, atorfiit nuunneqarnissaanni, suliffissaqassasut. Sinerissamimi atorfippassuaqanngilaq, AK-p siulittaasua Dina Olsen oqarpoq.
Borgmesserit pingasut siunnersuutaannik oqaluttuaq tamaat Sermitsiami atuaruk. Taanna pisiniarfimmi imaluunniit ataani linki atorlugu pisiarisinnaavat