soraarnerussutisiat
Kattuffiit Aqqaluaq B. Egede isumaqatiginngikkaat
Soraarnerussutisiaqarnermut akileraartarneq pillugu Naalakkersuisut neriorsuutiminnik unioqqutitsisut Kattuffiit Sulisitsisullu isumaqarput
Soraarnerussutisiat akileraarusersornissaannut aaqqissuussinermut siuartitsineq aningaasaqarnermut naalakkersuisup Aqqaluaq B. Egedep kattuffiillu akornanni aaqqiagiinngissutaalerpoq.
Tapinut eqquissaaq
Aaqqissuussineq atuisunut eqquissanngitsoq Aqqaluaq B. Egedep (IA) ullumi neriorsuutigaa. Taamalu neriorsuineq eqqunngitsoq efterskolinullu kalluaassasoq kattuffiit sulisitsisullu isumaqarput.
Kalaallit Nunaata avataani najugallit soraarnerussutisiaqarnerminni ingerlaannaq akileraartalernissaannut aalajangiisoqareertorlu ajornartorsiut piulerpoq. Aningaasat tigusassat nikinngikkaluartut isertitat annertusinerisigut akileraarut qaffanneqarpoq. Taamaannallu aaqqissuussisoqarneratigut Danmarkimi efterskolertut eqqungaaratarsinnaalerlutik.
Atuaruk: Soraarnerussutisiat pillugit isornartorsiut itigartikkaat
Ataqatigiissaarinerlunneq
Aaqqissuusinerup kingunerisinnaasai eqqumaffigineqartut aningaasaqarnermut akileraartarnermullu naalakkersuisup Aqqaluaq B. Egedep ullumi oqaatigaa.
Aningaasaqarnermulli naalakkersuisoqarfiup suleqatitik ilinniartitaanermut naalakkersuisoqarfimmiittut qanoq pisoqarsinnaaneranik ilisimatitsinissartik puiorsimagaat IMAK-p, Atorfillit Kattuffiata, Peqqissaasut Kattuffiata Sulisitsisullu isumaqarput.
Efterskolertunullu tapiissutit tusarniaaffigineqarnerat naammassineqareerpoq. Tapiissutillu angajoqqaajusut akilereeraartarnerisigut akilersorneqarput. Aaqqissuussinerullu nutaap, tassa soraarnerussutisiat erngertumik akileraartalernerisigut, tapiissutit kalluarneqartussanngorlutik.
- Nikalluallannaqaaq, inatsit akileraartarnerup siuartsinnissaanik imalik suliluunniit atuutilinngitsoq, nalunaarutitut siunnersuut siulleq tusarniaatigineqalermat. Siunnersuut akuerineqassappat Naalakkersuisut neriorsuutiminnik unioqqutitsinerannik kinguneqartussaq, kattuffiit tallimaasut tusagassiutinut nalunaarummi ilaatigut allapput.
Atuaruk: Kattuffiit soraarnerussutisianut aaqqissuusseqqinnernut aarlerisaarisut
Ajornartorsiut tikkuarneqarpoq
Aningaasaqarnermut ilinniartitaanermullu naalakkersuisoqarfiit tusarniaasoqarmat attaveqarfigisimagaluarpaat. Attaveqarfigineqartulli ajornartorsiut eqqumaffigisimanngilaat.
- Akileraarutit siuartinneratigut sulisartunut ataasiakkaat aningaasatigut kingunerlussanngitsoq akissuteqartut eqeersimaarluartut arlaasa maluginiarneratigut Naalakkersuisut neriorsuinertik eqqortinneraat paasineqarmat pissutaagunarpoq.
Inatsisissatut siunnersuut efterskolinut suliffeqarfinnullu
Inatsisissatut akuerineqartup kingunerisinnaasat eqqumaffigineqartut Aqqaluaq B. Egedep oqaatigaa.
- Ajornartorsiut aaqqiissutissallu inatsimmut siunnersuummi augustip 12-ni Inatsisartunut ingerlateqqinneqarnikumi allassimapput, Aqqaluaq B. Egede allappoq.
Inatsisissatulli siunnersuummi aaqqiissutaagallartumik siunnersuuteqartoqarsimavoq. Utoqqalinersisoqarneranilu akileraarnissaq ineqarnermut sillimasiineq, siusinaarluni soraarnerussutisiaqarneq utoqqalinersiallu kisitsinermi ilanngunneqarsimanngillat. Suliffeqarfinnut efterskolinullu tapissutit suli aamma eqqaaneqarsimanatik.