Katti Frederiksen: Oqaatsit ilinniarnermut matuersaataapput

Katti Frederiksen, 38-nik ukiulik, Ilinniartitaanermut, Kultureqarnermut Ilageeqarnermullu naalakkersuisoqarfimmi suliassaminut nangitassanut maanna iserniarsarivoq.

Naalakkersuisut Siulittaasuata, Kim Kielsenip, Katti Frederiksen, susassaqarfinnut taaneqareersunut naalakkersuisussatut ippassaq toqqarpaa. Maannalu naalakkersuisuulerpoq, Siumut partiitut tunuliaqutaralugu.

- Akuersivunga isumaqarama inuiaqatigiinnut tunniussassaqarluarlunga. Aamma isumaqarama inuusuttunut maligassiuinissarput pingaaruteqartoq. Akisussaaffimmik kivitseqataalluta aqqutissiuusseqataanissarput pingaaruteqartoq, Katti Frederiksen Sermitsiaq.AG-mut oqarpoq.

Taanna oqaatsit pillugit soqutigisaqartuarsimavoq. Oqaasilerineq, atuakkialerineq tusagassiutilerinerlu pillugit cand.mag.-itut Ilisimatusarfimmi ilinniagaqarpoq, ilinniarnerminilu ukiup affaa Alaskamiissimalluni, pingaarnertut oqaatsit kultoorilu pillugit paasisassarsiorfigisimasaminik.

Oqaatsit tamarmik pingaaruteqarput

Ilinniartitaanermut, kultureqarnermut ilageeqarnermullu naalakkersuisutut suliat ingerlanneqareersut nangissallugit piareersimavoq.

Aammali ilinniarneq taaneqartillugu, oqaatsit qitiulluinnarput:

- Isertuutissanngilara oqaatsinik pingaartitsisuugama. Oqaatsit ilinniarnermut matuersaataapput. Aammali oqaatsitsinnik pingaartitsinittulli, oqaatsinik allanik ilinniarnissaq pingaartitsigaara. Oqaatsit tassaapput ilisimasaqarnerulernissamut matuersaatit, Sermitsiaq.AG-mut oqarpoq.

Politikkimut sunneeqataassaaq

Katti Frederiksenip arnaa, Suka K. Frederiksen, namminersulivinnissamut Naalakkersuisuusimavoq. Taanna toqussi tikillugu, napparsimasut oqaaseqartartoqalernissaanik suliniuteqartuuvoq.

Katti Frederiksenimut politikkimik sulineq nutaajunngilaq.

Meeraanermini politikkimik oqallinneq, inuiaqatigiit pillugit oqallinneq aamma oqaatsit pillugit oqallinneq malinnaavigiuarsimavai sungiusimasaralugillu.

Meeraanerminiilli oqaatsit soqutigilluartuugamigit, aviisimut Atuagagdliutinut 1998-imi allaatigisaqarsimavoq, ilinniarnermi oqaatsit inissisimanerat pillugu. Taamani 16-inik ukioqarpoq.

- Tulluusimaarutigisariaqarparput oqaatsigut suli attakkatsigit. Aataakkugut aanaakkugut piniartukkuusimapput, angajoqqaagut ilinniagaqartuupput, uagullu ilinniagartuunngorluta. Oqaatsigut attattariaqarpagut, ineriartornermi katannginniassagatsigit. Qularinngilara tassuunatigut aamma uanga angusaqaqataasinnaallunga, soorunami naalakkersuisoqatigiit isumaqatigiissutaat malillugu, oqarpoq.