atornerluineq
Katsorsaaviup kisermaassisuunera Krusep isornartorsioraa
Katsorsaavik Nuuk atornerluisunut katsorsaasarnermi kisermaassisutut oqaaseqarluni, Siumup politikkikkut oqaaseqartartuata Karl-Kristian Krusep sakkortuumik isornartorsiorpaa.
Atornerluisunut katsorsaasarnissaq upernaaq peqqissutsimut naalakkersuisoqarfimmit suliarinnittussarsiorneqarpoq. Tamanna immikkoortunik qulingiluanik isumaqatigiissuteqarnikkut pivoq.
Katsorsaavik Nuuk suliassat qulingiluat tamakkerlugit pissarsiarissagai decembarimi aalajangerneqarpoq.
Suliassaq kisimi kivissinnaanngikkaa isumaqartoq
Tamanna aaqqiissut pitsaanngilaq, Karl-Kristian Kruse (S) isumaqarpoq, taanna maanna suliarinnittussarsiorneq pillugu § 37 naapertorlugu apeqquteqarpoq.
- Isumaqarama katsorsagassarpassuit pillugit Katsorsaavik Nuuk kisimiilluni kivissinnaanngilluinnartoq, Karl-Kristian Kruse apeqquteqarnermini tunngavilersuummini allappoq.
Katsorsaasut misilittagartuut toqqarneqanngitsut
Katsorsaasut namminersortut atorumaneqannginnerat, taassuma ingammik akuersaanngilaa.
Atuaruk: Katsorsaasut sivisuumik ilinniartarput
- Katsorsaanermik suliallit misilittagartuut suliassaarutsinneqarnerat akueriinnarneqarsinnaanngimmat, kommunit kisimik kivitsisinnaassuseqarfiginngimmata, katsorsaasartullu angalallutik inuiaqatigiinni pinngitsoorneqarsinnaanngimmata annertuumillu iluaqutaalernikuullutik inunnut aanngajaarniutinik atuivallaalersimasunut siumut inuunerup qaamasumik ingerlaqqilernissaannut, tunngavilersuummini nangilluni allappoq.
Katsorsaavik Nuuk toqqarneqarneranut peqqissutsimik naalakkersuisoqarfiup naliliinerani, akit pitsaassutsillu akornanni pitsaanerpaamik neqerooruteqarnerat pingaartissimavaa.