Katsorsaasarneq nutaaq ilaqutariit inuunerannik allanngortitsisoq: Maanna anaanaasoq panialu unnuakkut eqqissillutik sinittalerput

Suut tamaasa misilereerpaat.

Lovelyn Potestad Chinghuatip panini 11-nik ukiulik Decubalimik aamma Locobasemik tarngutinillu allanik akisuunik tanittaraluarpaa.

Kisianni iluaqutaavallaanngillat.

Taassuma pania nissumigut ammarterneqartarpoq – aap, allaat timaa tamakkerlugu, Lovelyn Potestad Chinghuat oqaluttuarpoq.

Tamannalu taakkununnga unnuakkut sinittarnerannut ajornartorsiuteqalersitsivoq. Angelicap ungillerisarnerani anaanaata kilertiterluni kumittarneranik pinaveersaartitsiniartaraluarpoq.

- Amia qanoq iliussanerlugu nalulivissimagaluarpara.

Kiisami sinilluartalertut

Pisoq iliuusissaaruffiusoq qujanartumik aaqqiissutissarsineqarpoq. Tassami Angelica Nuummi nakorsiartarfimmi UV atorlugu amermik katsorsaanissamut neqerooruteqalernerata kinguninngua, kiisami amia mamikkiartulerpoq.

Ungillerisarnera annikillivoq, maannalu unnuakkut eqqissillutik sinittalerput.

Naak Angelica maannamut katsorsaanernit qulinit 20-nut amerlassuseqartussanit pingasoriaannarluni katsorsarneqarsimavoq.

- Neqeroorut nutaaq nuannaarutigeqaara, maannalu unnuami sinissinnaanngorpugut, Lovelyn Potestad Chinghuat oqarpoq.

Iluatsilluartorujussuaq

Katsorsaariaatsip siunissami nunatsinni sumiiffinni allanut siammarterneqarnissaa neriuutigaa, taamaalilluni amerlanerusut iluaqutiginiassammassuk.

Nakorsap immikkut ilisimasallip Lone Hovep oqarnera naapertorlugu, maskiinat nutaat iliuatsilluartorujussuupput. Amerlasuut katsorsarneqarnissaminnut soqutiginnipput, taanna ilisimatitsivoq.

Lovelyn Potestad Chinghuat assigalugu, peqqinnissaqarfimmi aqutsisoqatigiit politikerillu taakkununnga aningaasaliissasut Lone Hove kissaateqarpoq, taamaalilluni siunissami innuttaasut amerluuteqartut nunatsinni sumiiffinni amerlanerusuni katsorsarneqarsinnaalissammata.

Piffissap tamanna takutikkumaarpaa. Kisianni ataaseq nalunanngilaq: Angelica 11-nik ukiulik arnaalu inuummarisseqqipput.