piukkunnganngitsoq
Katsorsaaneq pillugu pikkorissarneq naammanngilaq
Inuit atornerluinermik ajornartorsiutaat pillugit sulinissamut sapaatip akunnerini marlunni ilinniarneq naammanngilaq, Demokraatineersoq Randi Vestergaard Evaldsen isumaqarpoq.
Aanngajaarniutinik atornerluisut ajornartorsiutaannik katsorsaatitsisarnissamut sapaatip akunnerini marlunni pikkorissartitsineq naammanngerujussuarpoq. Demokraatit siulittaasuat Randi Vestergaard Evaldsen isumaqarpoq.
- Paasisakka toqqammavigalugit, Peqqissarnermik Ilinniarfimmi Sammivik MNP-mi ilinniartut taakkuusut katsorsaaqataasussat nunatsinni? Una ilinniagaq/pikkorissarneq sapaatip akunneranik marlunnik takissusilimmik pikkorissarneruvoq. Naalakkersuisut toqqissisimanartutut aarlerinanngitsutullu isigivaat, atornerluisut katsorsartinniartut katsorsaasoqarnissaat, taamak sivikitsigisumik/naatsigisumik pikkorissarsimasunut?, Randi Vestergaard Evaldsen Naalakkersuisunut saaffiginninnermini aperivoq.
Modulit marluk
Katsorsaanermik suliaqartunngornissamut ilinniagaq modulinik marlunnik ataqatigiissunik imaqartoq, Peqqissaanermik Ilinniarfiup nittartagaani atuarneqarsinnaavoq. Tullia fevruaarip tallimaanit - februaarip 17-ata tungaanut ingerlanneqassaaq.
Atuaruk: Suleqatit imigassarsunnippa?
- Ilinniakkami peqataanerup kingorna najukkami inunnik atornerluinermik ajornartorsiuteqartunut ikiortitut atorfeqarsinnaavutit. Atornerluisunut saaffissatut atornerlueriaatsit assigiinngitsut takusinnaanngorlugit paasisinnaanngorlugillu ilinniarsimalissaatit, aamma katsorsartinnissamut kajumissaanissamut, kiisalu Nunatsinni katsorsaariaatsinut ilisimasanik siammarterissallutit, tamanna aamma allaqqasoq atuarneqarsinnaavoq.
Aallartinnissamut piumasaqaat
Pikkorissarnermut peqataasut inuit akunnattumik sivisussusilimmik inulerinermik, perorsaanermik imaluunniit peqqissaanermik ilinniagaqartuussapput.
Atuaruk: GE: Nakkutiginninneq mianernarpoq
Inuttut aamma nalilertinneq tunngavigalugu aamma ilinniakkamik aallartinnissamut periarfissaqarpoq.
Sapaatip akunnerini marlunni Peqqissaanermik Ilinniarfimmeereernerup kingorna, "inuit eqqarsartaatsikkut ajornartorsiortut" katsorsarnissaannut ilinniartitaasoqarsinnaanngitsoq, Demokraatit siulittaasuat isumaqarpoq.
- Pisussaaffeqarpugut katsorsaariaatsit iluaqutaasut atussallugit, katsorsaariaatsillu pitsaassusaat ikiortarialinnut naleqquttuunissaat, ikiortariallit ingerlaqqinnissaminnut sakkussaqarnissaat pisariaqarmat, Randi Vestergaard Evaldsen oqarpoq.