Katersuussinnaanermut killilersuutit peerneqarput
Inini kikkunnilluunniit iserfigineqarsinnaasuni killilersuutit peerneqarput. Naalakkersuisut taama aalajangerput.
Ullumi arfininngorneq 8. maj aallarnerfigalugu init kikkunnit tamanit iserfigineqarsinnaasuni inuit qanoq amerlatiginissaanut killilersuutit atorunnaarsinneqarput. Tamanna isumaqarpoq piniarfinni, timersortarfinni neriniartarfinnilu inuit qassit isersimasinnaanerannut killilersuutit peerneqartut.
Naalakkersuisut tusagassiorfinnut taama nalunaaruteqarput.
- Taamaalilluni inuit ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat taamaallaat isersimaqqusaanerannik killilersuinerit taamaatinneqarput, Namminersorlutik Oqartussat taama ilisimatitsipput.
Piumasaqaatit allat
Piumasaqaatit allat, inini kikkunnilluunniit iserfigineqarsinnaasuni suli atuupput. Ilaatigut assaat eqqiluisaartinnissaannut paasissutissat Nakorsaaneqarfimmeersut suli nivingatinnissaat piumasaqaataavoq, taamatullu isersimasunut imeq, qaqorsaatit assannullu spritimik peqarnissaq suli piumasaqaataalluni.
Piumasaqaatilli ilaat aamma peerneqarput.
Aaqqissuussanimi aaqqissuisunut piumasaqaatigineqarunnaarpoq aaqqissuussani inut 50-it sinnerlugit katersuuffigisaanni pequtinut aamma atortunut peqataasunit attorneqartartunut tunillannartuiarneqarnissaannik piumasaqaat peerneqarpoq. Taamatullu assartuutit issiaffiusinnaasut sinnerlugit ilaasoqaqqusaannginnera piumasaqaataajunnaarluni.
Tikittut amerlanerusut
Sapaatip akunnera manna aamma aallarnerlugu nunatsinnut tikittartut Naalakkersuisunit amerlineqarput. Oqartussat akuerisaat kisimik tikittarunnaarlutik, sapaatip akunneranut amerlanerpaamik 600-t nunatsinnut tikissinnaalerput. Tikinnermili angerlarsimaqqaartussaaneq tikereernermilu coronamut misissortittarneq suli atuupput.
