Katersugaasivik tusaamasaq silap pissusianit aseroriartortinneqartoq
Illu Knud Rasmussenip inunngorfia – ullutsinni katersugaasiviusoq takornarianillu ussagarneqartartoq – silap pissusiata allanngoriartorneranit eqqugaavoq. Illup toqqavia aseroriartorpoq. Illup ukiunik 160-inik pisoqaassusillip nutarterneqarnissaa nukinginnarsivoq.
Silap pissusiata allanngoriartornera sumiiffinni amerlasuuni sakkortuumik eqquivoq. Tamanna Ilulissani aamma atuuppoq, allanngoriartorneratami kinguneranik issittumut ilisimasassarsiortartutut nunani tamalaani tusaamasap, Knud Rasmussenip illu peroriartorfigisimasaa, Ilulissani katersugaasivik annertuumik ajoquserneqarsimammat.
Aviisi AG taama allappoq.
Ajoqusernerit isaannarmik ingerlaannartumik takuneqarsinnaapput.
Tummerai equngapput natiilu isugutallutik. Illutaata pingaarnerup sanianiittoq illunnguaq kiviartorpoq. Katersugaasivimmi saqqummersinneqartut saniatigut tassani aamma pigineqarput allakkat toqqortaatigineqartut allallu tammatsaalineqartariaqartut.
Toqqaviata ilaani mikisunik angisuunik quppanitsitersimavoq.
- Ernumanartoqartippara. Immaqa allamut nuuttariaqalersinnaavugut. 2015-imili illup aserfallakkiartornera paasigatsiguli nutarternissaanut periarfissanik ingerlaannarluta misissuilerpugut. Ukiut ingerlareerput, taamalu nukinginnarsigaluttuinnarluni.
Ilulissani Katersugaasivimmi pisortaq Anja M. Reimer taama oqarpoq.
Aviisimi AG-mi atuarnerusinnaavutit. Aviisi uani pissarsiariuk: