Katersugaasivik Aka Høeghip suliaanik saqqummersitsilluni ammaalersoq
Nuuk Kunstmuseum Aka Høeghip atuakkiaanik saqqummersitsinermut peqatigitillugu eqqumiitsuliortup 1973-imiit ullumimut eqqumiitsuliaanik saqqummersitsissaaq.
Inuiattut ullorsiornermi eqqumiitsuliortup Aka Høeghip suliai qitiutinneqassapput. Nuuk Kunstmuseum eqqumiitsuliortup suliaanik eqqumiitsuliortorlu pillugu atuakkiamik Milik Publishingip saqqummiussaanik saqqummersitsissaaq.
Nuuk Kunstmuseum nittartakkamini allappoq:
- Aka Høeghip piffissaq inuuffini inuuffigiutigalugu takussutissiaqarfigaa. Taamaattumik saqqummersitsineq Malugisartakkat // Sansninger assigiinngitsorpassuartigut isigineqarsinnaavoq. Inuit Aka Høeghip eqqumiitsuliaanit attortissimasarnerat saqqummersitsinermi aamma malugineqaqqissasoq neriunarpoq.
Saqqummersitat oktobarip pingajuata tungaanut takuniarneqarsinnaapput, Aka Høeghillu 1973-imiit ullumimut suliarisimasai takuniaanermi takuneqarsinnaallutik.
Eqqumiitsuliortoq pillugu atuakkiaq Milik Publishingimit saqqummersinneqartoq cand.mag. atuakkialerinermik eqqumiitsuliortuunerullu oqaluttuarisaaneranik ilisimatusarsimasumit Mai Misfeldtimit atuakkiarineqarsimavoq, Aqaaluk Lyngelu atuakkami aallaqqaasiisuusimalluni.
- Aka Høeghip uiata assiliisartup atuakkiortullu Ivars Silis-ip atuakkami assit atorneqartut amerlanersaat assilisarai. AKA HØEGH milik publishing-imiit oqaatsit pingasut – kalaallisut, danskisut tuluttullu – atorlugit saqqummerpoq 248-nillu qupperneqarluni, atuakkanik naqiterisitsisarfik atuagaq pillugu allappoq.
Ataasinngorpat nal. 14 saaqqummersitsinermut atukkamillu saqqummiinermut atatillugu eqqumiitsuliortoq Nuuk Kunstmuseumi najuutissaaq.
Eqqumiitsuliortoq pillugu atuakkiaq Milik Publishingimeersoq aviisimi AG-mi nalilerneqartoq aamma atuarneqarsinnaavoq. Aviisi allaaserisap naqqani nassaarisinnaavat:
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...