Katersugaasiviit suliffeqarnermi atukkanut malittarisassat unioqqutippaat
Kalaallit katersugaasiviini pisortat suliffeqarfimmi avatangiisit sulisut annertuumik taarseraannerat pissutigalugu ernumassuteqarfigaat, tamanna uippakajaarnermik kinguneqartarpoq. Suliffeqarfimmi avatangiisit pillugit misissuisoqarnissaa taamaattumik kissaatigaat.
Nunatsinni katersugaasiviit tamarmik Nunatta Katersugaasivia Allagaateqarfialu ilangullugit ataatsimeersuaqqammerput pikkorissarnertalimmik. Tamanna ukiut allorlugit pisarpoq.
Tassani sammisat arlallit ukkatarineqarnissaannik pisariaqartitsiffiusut pillugit isumaqatigiissutigineqarpoq:
- Umiarsuit takornariartaatit tikittarnerini akit ammasarfiillu pillugit assigiiaarnerusumik malittarisassanik amigaateqarpugut, taavalu tikinngittoornerinisa kinguneranik iliuusissat, soorlu no-show.
- Katersugaasiviup suliarisartagai piareersaatillu nittarsaanneqarnerusariaqarput, ilanngupparput asseq takuneqarsinnaavoq sulianut tunngasoq. Katersugaasivinni sulisut issiaannarneq ajorput, suliassarpassuaqartoqartarpoq.
- Katersugaasivimmi sulisukinneq suliarpassuaqarnerlu pissutigalugu inatsisit malillugit suliassaraluagut naammassisinnaanngilagut, tamannalu sulisoqarnermi inatsit malillugu arlalinnut stressemik kinguneqarpoq, qularnanngittumillu aamma sulisut taarseraanneranik kinguneqarluni. Nutaamik arbejdsmiljø pillugu misissuisoqarnissaa innersuutigaarput.
- Katersugaasiviit amerlanerit illutoqqani aserfallassimaqisuni inissisimapput, tamakku ukiuni makkunani aaqqittariaqaraluarput. Forsikring, kiassarneq, tillinniarnermut alarm kultuoorikkut kingornussassanut illersuutigineqartussaagaluit katersugaasivinni amigarluinnarput. Tamanna misissorneqartariaqassaaq. Katersugaasivinni katersanik tigussaasunik tigussaanngittunillu katersuinermi assigiiaarnerusumik periusissamik sanasoqarnissaa kissaatiginarpoq, aamma toqqorsivinni qanoq inissisimaneq misissoqquneqarpoq.
Nukakami ileqquusumik ataatsimeersuartoqarpoq, taanna tassaavoq Nunatsinni katersugaasiviit kattuffiat. Siulittaasoq Peter Nygaard Maniitsumi katersugaasivimmeersoq qinerneqaqqippoq. Ilaasortat sinnerit ukuupput: Nivi Christensen, Nuummi Eqqumiitsulianik Saqqummersitsivik, Frederik Larsen, Nunatta Katersugaasivia Allagaateqarfialu, Linda Grønvold, Qeqertarsuarmi Katersugaasivik, Peter Kruse, Uummannami katersugaasivik kiisalu Dan Ullerup Qaqortumi kataersugaasivik, tamanna kattuffimmit tusagassiuutinut nalunaarummi atuarneqarsinnaavoq.
Naalakkersuisut katersugaasiveqarneq pillugu takorluugaaat, Kultureqarnermut Naalakkersuisup Ane Lone Baggerip saqqummiuppai.