Kassutsitsineq, eqqaamasaarunneq sinnarluttarnerlu: Innuttaasunik kiffartuussivimmi MitID uivertitsisimavoq
Pisortat NemID-mik atorunnaarsitsinerat Nuummi innuttaasunik kiffartuussivimmi uivertitsisimavoq. Innuttaasunik kiffartuussivimmi pisortap oqaluttuaraa, sulisut stressertutut misigisimasimasut.
Iluarsineqarpoq: Siuliani aningaaseriviit NemID-mik matusisit allapparput. Tamanna kukkuneruvoq. Pisortat inatsit malillugu MitID-imut nuupput. Aningaaseriviillu malinnaasariaqarput (aaqq.)
- Aatsaat taama ajortigaaq.
Taamatut oqarpoq Lone Rosengren Kommuneqarfik Sermersuumi innuttaasunik kiffartuussivimmi pisortaasoq.
Kalaallit Nunaanni aningaaseriviit NemID-mik oktobarip 31-ani atorunnaarsitsinerisa kingorna taamatut oqarpoq. Innuttaasummi atorunnaarsitsinissamut ulluliussap nalllinnginnerani MitID-mut atassusersinnaasarsimanngillat, tamatumalu malitsigisaanik netbankimut isersinnaasarsimanatik.
Innuttaasullumi ikiortissarsiorlutik innuttaasunik kiffartuussivimmut saaffiginnittarsimapput.
Ulappussimaqisut
Lone Rosengren Pedersen oqaluttuarpoq, oktobarip 31-ata nalliutilernerani kingornalu inuit 300-nik amerlanerusut ullormut Nuummi innuttaasunik kiffartuussivimmut ikiortissarsioriartortarsimasut.
- Inuppassuit takkuttarsimapput. Tamatuma saniatigut oqarasuaatikkut mailikkullu saaffiginnittorpassuaqartarsimavoq, MitID-ili malillugu taakku ikiorsersinnaasimanngilagut. Takkullunimi aatsaat ikiorserneqarsinnaagami - tamannalu inuit ilaasa paasiuminaatsissimavaat, pisortaq nassuiaavoq.
Innuttaasunik kiffartuussivimmi pisortaq oqaluttuarpoq, sulisut pingasunngorneq tikillugu ulappussimaqisut, tassa aningaaseriviit NemID-mik atorunnaarsitsinerisa kingorna ullut qulit tikillugit ulappussimapput.
Innuttaasut innuttaasunik kiffartuussivimmut saaffiginnittarlutik oqaatigisarsimavaat, utaqqikatattarsimallutilli.
Ingerlaqqittarlutillu aggeqqittarsimapput, Lone Rosengren Pedersen nassuiaavoq:
- Inuit sivisuumik utaqqisariaqartarnertik naammaginngilluinnarsimavaat, taanna oqarpoq nassuiaatigalugulu, uagut inuit naammagittarunnaarsinnaasartugut:
- Utaqqikatakkaagaangatta, inuit ilaat sorraallisinnaasarput.
Innuttaasunik kiffartuussivimmi pisortap nassuiaatigaa, innuttaasut saaffiginnittartut ikilisimagaluartut, sulisut stressertutut misigisimasarsimasut, tassa uumatimikkut kassutsitsisarsimapput, eqqaamasaaruttarsimallutik sinnarluttarsimallutillu.
- Unilaarfeqaratik ulapputiinnavissimapput. Tassanngaannarli anersaartorfissaqqaqqileriasaarsimavugut. Sulisumma ilaat pujoralaajaalaarsinnaalersimapput, Lone Rosengren Pedersen illarluni oqaluttuarpoq.