Karrat: Upalungaarsimanermut pilersaarutit akuerineqariaannanngortut

Karrani qaqqap sisooratarnissaanut Avannaata Kommuniata upalungaarsimanermut pilersaarusiai Sermitsiaq.AG-p allagaatinik takunnissinnaaneq atorlugu pissarsiarai. Pilersaarutit Naalakkersuisunit augustip ingerlanerani akuerineqassapput.

Tassaarsuaqartoqarnissaanut aarlerinartoqarneranik paasisaqartoqarniariartoq nunaqarfinni tamani Uummannamilu kalerrisaarutit aallartinneqassapput. Upalungaarsimanermut suliaqartut pisortaata politiit kalerrissavai, taakkulu annaassiniaanermik suliaqassapput innuttaasunillu qimagussuutsitsinermik ataqatigiissaarisuussallutik. Upalungaarsimanermut ataatsimiititaliarsuup aarlerinartorsiorfiusuni arfinilinni annaassiniaaneq aqussavaat.

Qaqqaq sisuussappat innuttaasut aarlerinartorsiorfimmiittut ukununnga qimangussuunneqassapput:

• Ikerasak: Atuarfik
• Niaqornat: Illu Nuilaasaq / Kangeq
• Qaarsut: Meeqqerivik / Timmisartoqarfik
• Saattut: Illu Sullivik / atuarfik
• Ukkusissat: Atuarfik
• Uummannaq: Timersortarfik

Qimagussuuffiusuni qimagussuunneqartut inissinneqassapput nerisassaqartinneqassallutillu.

Tusagassiorfinnut oqaaseqanngikkallarneq

Tassaarsuaqartoqareernerani sumiiffinni torersaanissamut malittarisassat assigiinngiiaarput. Oqartussat tamarmik aseruatitertoqarsimanerup annertussusaanik ilisimatinneqassapput. Upalungaarsimasut kommunimi teknikkeqarfimmi pisortap aseruatitertoqarsimanerata kingorna torersaanissamik ataqatigiissaarinissamik suliaqassapput. Torersaanermi politiit upalungaarsimasullu atortussanik tunniussissapput, eqqakkanillu assartuinermik isumaginnissallutik.

Nunaqarfinni Uummannamilu kommunimi sulisut torersaanermi ikiuutissapput, politiit upalungaarsimanermillu suliaqartut pisortaat akisussaasuussallutik.

Torersaanermut tunngatillugu tusagassiortunut oqaaseqartoqassanngilaq. Tamanulli nalunaaruteqartoqassatillugu kommunimi borgmesteri Palle Jerimiassen, attaveqatigiinnermi pisortaq imaluunniit politiit paasissutissanik innuttaasut tusartariaqagaannik tusagassiorfinnut apuussisassapput.

Nalilersuineq

Innuttaasut qimagussuunneqareerpata annaassiniarnerlu naammassippat nalilersuisoqassaaq. Tamanna upalungaarsimanermut suliaqartut pisortaannit, kommunimi teknikkeqarfimmi pisortamit qatserisartullu pisortaannit aqunneqassaaq.

Avannaata Kommunia Niaqornani qimagussuutsitsisoqarnissaanut atatillugu tummeqqiorsimavoq, innuttaasut sukkanerusumik qullasinnerusumukarsinnaaqqullugit.

Najukkanut tassaarsuup tikiunnissaanut piffissat:

• Nuugaatsiaq: 7 minutter
• Illorsuit: 13 minutter
• Qaarsut: 26 minutter
• Niaqornat: 23 minutter
• Uummannaq: 30 minutter
• Saattut: 35 minutter
• Ukkusissat: 26 minutter
• Ikerasak: 38 minutter

Naalakkersuisut aarlerinartorsiorfiusunut majimi tikeraarput, innuttaasut ilisimatikkiartorlugit. GEUS-imiit norskillu ilisimatuuinit naatsorsuinerit nutaat takutippaat Karrani qaqqap sisooratarsinnaasup anginerup sisoornerani tassaarsuaq annertunerusussaasoq.

Innuttaasut sumiiffinni aarlerinartorsiorfinniittut nuukkusukkuni ininik attartugassaqarnissaannik neqeroorfigineqarsimapput.