Karlsen: Aalisarneq pillugu ataatsimoornissarput pingaaruteqarpoq

- Aalisarnermik ataatsimoorussinissarput nassuerutigissallugu pingaaruteqarpoq. Taamaattumik aamma aalisarneq silarsuarmioqatinit piumasaqaatinut naleqqusarneqassatillugu ataatsimoornissarput suleqatigiinnissarpullu pingaaruteqarpoq.

Aalisarnermut, piniarnermut nunalerinermullu Naalakkersuisoq Finn Karlsen Siumeersoq aalisarneq pillugu Nuummik Hotel Hans Egede-mi isumasioqatigiinnerup ammarneqarnerani oqalugiarnermini ilaatigut oqarpoq.

Isumasioqatigiinneq Aalisarnermut, Piniarnermut Nunalerinermullu Naalakkersuisoqarfimmit KNAPK aamma Kalaallit Nunaanni Sulisitsisut Peqatigiiffiat suleqatigalugit aaqqissuunneqarpoq.

Aalisarneq pillugu isumasioqatigiinnermi siunertarineqarpoq nunatsinni aalisarnermi unammilligassat suussusersineqarlutillu eqqartorneqarnissaat kiisalu aalisarnerup aningaasarsiornikkut peqassuserlu eqqarsaatigalugit attanneqarsinnaasumik ingerlanneqartariaqarneranut sinaakkutissanik naleqqussaasariaqarnissamik eqqartuinissaq.

Aalisarneq nunatsinnut iluaqutaassaaq
- Maaniittugut tamatta aalisarnermik ataatsimut soqutigisaqarpugut. Taamaattumik unammilligassat aamma ataatsimooruppavut. Aamma taamaattumik nunatsinni aalisarnermut uagut nunarsuarmioqatittalu piumasaqaatitsinnut ineriartortitseqqinnermik naleqqussaanermillu sulineq ataatsimoorutissavarput. Aamma suli piumasaqarfigineqannginnitsinni. Ataatsimut akisussaaffiuvoq, Finn Karlsen oqarpoq.

- Aalisarnerup Kalaallit Nunaata aningaasaqarnerani maligassiuiffiuinnarnissaa taamatullu aamma aalisarnerup Kalaallit Nunaannut tamarmiusumut iluaqutaaginnarnissaa kissaatigaara. Taamaattumik aalisarneq aamma ataatsimoorutissavarput. Aqutsineq, aalisartut
suliffissuaqarnerlu. Siunissami aalisarneq sapinngisamik pissarsiaqarfiginiarlugu suleqatigiissaagut.

Isumasioqatigiinnerup ammarneqarnerani Finn Karlsenip oqalugiaataa tamaat uani atuarneqarsinnaavoq