Karl Tobiassen KNAPK-mit isornartorsiut pillugu: Oqaatsit atorneqartut kinguneqartussamik oqaloqatigiinnissamut tunngaviliinngillat

KNAPK-mit Namminersorlutik Oqartussat sapaatip-akunnerani matumani aappassaa sakkortuumik isornartorsiorneqarput. Maanna isornartorsiutigineqartut aningaasanut inatsisissamut aamma aalisarnermut piniarnermullu naalakkersuisumut tunngatinneqarlutik.

Aningaasaqarnermut Naligiissitaanermullu Naalakkersuisup Naaja H. Nathanielsenip aningaasanut inatsisissatut siunnersuummut isornartorsiut oqaaseqarfigerusunngilaa, oqaaseqaateqarnissamullu Karl Tobiassen innersuussutigalugu.

Taassuma allakkatigut Sermitsiaq.AG-mut akissuteqarnermini kiisalu tusagassiorfitsigut nalunaaruteqarnermini sakkortuumik isornartorsiuisoqarnera qisuariarfigaa.

Aalisarnermut Piniarnermullu Naalakkersuisoqarfimmit tusagassiorfitsigut nalunaaruteqarnermi erseqqissaassutigineqarpoq, KNAPK-p oqaatsit nipilu atugai kinguneqartussamik oqaloqatigiinnissamut tunngaviliinngitsut.

- KNAPK-p Aalisarnermut Piniarnermullu Naalakkersuisumik oqaloqateqartarnerup attaveqartarnerullu pitsanngortinnissaa kissaatigippagu tusagassiuutitigut saassussineq taanna aqqutissaanngilaq, nalunaaruteqarnermi oqaatigineqarpoq.

Isornartorsiut paasisinnaangikkaa

KNAPK-p siulittaasuata Nikkulaat Jeremiassenip isornartorsiuinermini Naalakkersuisut Inatsisartullu kaammattorpai susassaqartut pineqartut oqaloqatigeqqullugit, aammalu "pisortaqarfiup qarmarsuisa matuisalu tunuannut toqqoqqajunnaaqqullugit". KNAPK-mit taakku saniatigut oqaatigineqarpoq, Karl Tobiassenip aalisartunut siunnersorteqartitsisarnermut atatillugu pingaarnersiuisimanera "annertuumik killuussinertut oqaatigineqarsinnaasoq”.

Aalisarnermut Piniarnermullu Naalakkersuisup Karl Tobiassenip KNAPK-mit isornartorsiut tusaramiuk paasisinnaannginnerarpaa.

- KNAPK-mik ingerlaavartumik oqaloqateqartarpunga ataatsimeeqateqartarlungalu, tamannalu tunngavigalugu atorfillit tunuanni toqqortortunga tunuliaqutinnullu akerliusumik ilinniorninnik oqaaseqaateqarnera ilisarisinnaanagu. Sineriak tamaat angalaffiginikuuara tassanilu KNAPK-p Upernavimmit Nanortalimmut immikkoortortaqarfii najukkanilu aalisartut oqaloqatiginikuullugit, naalakkersuisoq oqarpoq.

Oqaatsit sakkortuut

Karl Tobiassenip tusagassiorfitsigut nalunaaruteqarnermini KNAPK-p naalakkersuisoqarfiullu ataatsimeeqatigiittarsimaneri piffissamilu aggersumi ataatsimeeqatiginissaat oqaloqatigiittarsimaneri saqqummiuppai.

- KNAPK sakkortuumik kaammattussavara, sinerissap qanittuani aalisarnerup ineriartortinneqarnera pillugu Aalisarnermut Piniarnermullu Naalakkersuisoqarfimmut uannullu tunngavilersukkamik kinguneqartussamillu oqaloqateqartaqqullugu, naalakkersuisoq Karl Tobiassen oqarpoq.

KNAPK-milli isornartorsiuineq attatiinnarneqarpoq.

- Naalakkersuisut isumasiuiissaq angusinnaanngippassuk, taava ilaasortavut peqatigalugit oqariartuutigisatta kissaatittalu paasititsiniutiginissaa tullinnguuttariaqalissaaq, Nikkulaat Jeremiassen naggasiilluni oqarpoq . Forstår Naalakkersuisut ikke at konsultere os