Nikinneq
Karl-Kristian Kruse: Ernerma pisariaqartippaanga
Maanna piniarnermut, aalisarnemut aamma nunalerinermut naalakkersuisuusimanngortoq naapertorlugu, politikki ilaquttanut aamma piniartutut inuunermut inituallaalersimavoq
Karl-Kristian Kruse (S) decembarimili 2014-imi atorfeqalernermini maanna aalisarnermut, piniarnermut aamma nunalerinermut naalakkersuisutut atorfini qimappaa.
Inatsisartuni immikkut ittumik ataasinngornermi oqallittoqarnerani, Krusep aalajangernini nammineq tunngavilersorpaa, ilaqutariinnertut inuunini politikkimut pilliutiginiarnagu.
Atuaruk: Pisortatigoortoq: Krusep Naalakkersuisut qimappai
Ernini ilinniartissagaa
- Naalakkersuisunut ilaasortanngorama qinigaaffiup naammassinissaata tungaanut naalakkersuisuunissannut piareersimavunga. Kisianni inuuneq maanna allanngorpoq. Ernera piniartunngussalluni aalajangerpoq, uangalu eqqaaniissaanga piniartutsialanngornissaanullu ilinniartillugu, Inatsisartut oqaluttarfianit oqarpoq.
- Piniartunngornissaminut uanga ikiortigissallunga pisariaqartippaanga. Neriuppunga inuit aalajangernera paasiumaaraat. Naalakkersuisutut atorfeqarnera 2018-ip tungaanut nangissinnaanngilara (qinigaaffik, aaqq.), tamanna uannut annertuallaartoq nalilerakku.
Karl-Kristian Kruse naggataatigut assersuusiorluni oqarpoq:
- Tamatta naasuuvugut, ataatatullu uanga ernera sikkerluarnissaanik isumaginiarpara.
Taassuma parteeqataa Nikolaj Jeremiassen atorfimmut inissippoq. Ukiut pingasut kingulliit ingerlanerini Jeremiassen atorfimmi tassaniittut sisamassaraat.