Karl Kristian Kruse aalisarnermut ataatsimiititaliami ilaasortanngortoq
Kim Kielsenip Demokraatit Naalakkersuisunut ilaatilerlugit Naalakkersuisut pingasunik ilammagit, Inatsisartut Aalisarnermut, Piniarnermut Nunalerinermullu Ataatsimiititaliaa ilaasortanik nutaanik marlunnik ilaneqarput.
Nunami inuussutissarsiutit pingaarnersaannut tunngatillugu ataatsimiititaliaq ataasiaannarani isornartorsiorneqartartoq marlunik nutaanik ilaasortaatitaqalerpoq.
Aalisarnermyt, Pinianernermut Nunalerinermullu Ataatsimiititaliami ilaasortat Siumumeersoq Erik Jensen Demokraatineersorlu Steen Lynge ilaasortaajunnaarput, taakkununngalu taarsiullugit Siumumeersoq Karl Kristian Krusse Demokraatineersorlu Simigaq Heilmann ilaasortanngorlutik.
Steen Lynge Inatsisartunit sulinngiffeqarnissamut maannakkorpiaq qinnuteqarsimanngilaq, ataatsimiititalianilu ilaasortat Naalakkersuisunut ilaasortaasussaanngimmata, parteeqataa ilaasortanngortinneqartariaqarsimavoq.
Karl Kristian Kruse maannamut sinniisussaasimammat, sinniisussamik nutaamik nassaarniartoqarsimavoq, Doris J. Jensenilu (S) sinniisussanngortinneqarluni.
Ataatsiimititaliap susassaqarfimmi Naalakkersuisoq, Jens Immanuelsen, arlaleriarluni isornartorsiortarsimavaa. Tamanna kingullermik pivoq, sapaatip akunnerani kingullermi upernaakkut ataatsimiittoqarnerani, tassani ataatsimiititaliaq inatsisissatut siunnersuutip aappassaanik suliarineqarnerani ilaatigut allappoq, Naalakkersuisut ataatsimiititaliap inatsisissatut siunnersuummik suliaqarnermini ilannguteqqusai allannguutissatullu siunnersuutaa Naalakkersuisut ilanngussimanngimmassuk ataatsimiititaliap suliai ajoquserneqarsimasut. Tamatuma malitsigisaanik Partii Naleraq tatiginninnginnermik taasisitsinissamik nalunaaruteqarpoq, tamannali amerlanerussuteqartunit pinngitsoortinneqarpoq.