Karl Frederik Danielsen: Tunngavissanik aningaasartassaanillu eqqortunik tunisigut
Siunissami ilaasunik angallassinermut atatillugu kiffartuussinissamut isumaqatigiissutissat ilusissaat pillugit Naalakkersuisut borgmesterinik aammalu Inatsisartunik ataatsimeeqatiginneqqammerput. – Pitsaasumik siunnerfilimmillu oqaloqatigiilluarpugut, tamatumalu kingunerisaanik immersorneqarluarpugut, siunissami kiffartuussinissamik isumaqatigiissutit ilusissaannut tunngatillugu, attaveqaqatigiinnermut naalakkersuisoq, Karl Frederik Danielsen (S) oqarpoq.
Naammagittaalliuutit imaaginnavissut aammalu ajornartorsiutit siumoortumik ilisimaneqarsinnaanngitsut pissutaallutik, Naalakkersuisut arlaleriarlutik isumaqatigiissutit qaavisigut tapertaasunik isumaqatigiissusiortariaqarsimapput, tamatumalu malitsigisaanik Naalakkersuisut arlaleriarlutik ilassutitut tapiissutinik qinnuteqartariaqarsimapput. Tamatuma inerneraa kiffartuussinissamut isumaqatigiissutinut neqeroortitsermut atatillugu 2016-mi isumaqatigiinniarnerni aningaasartaliussanut sanilliullugu aningaasanik amerlanerujussuarnik akiliisariaqarsimanerat. Tassa imaappoq ullumikkut aningaasartuutit 153 millioner koruunit sinnersimavaat, massa aningaasaliissutaasut 121 millioner koruuniinnaagaluartut.
Aviisi Sermitsiaq taama allaaserisaqarpoq.
Attaveqaqatigiinnermut naalakkersuisoq, Karl Frederik Danielsen (S) tassunga tunngatillugu erseqqissaavoq ukiorpassuit ingerlanerini kiffartuussinissamik isumaqatigiissutit tunngavigalugit angallassineq tulleriiaarinermi kingulliunneqartartunut ilaasimasoq, tamannalu aallaaveqartoq 2005/06-mi Inatsisartut tulleriaarinerminni ilinniartitaanermut aningaasaliissutit tulleriaarinermi siuarsarneqarnissaannik aalajangersimanerannik, taamatut aalajangernermi aningaasat kiffartuussinissamut isumaqatigiissutinut atorneqartartuugaluit ilarpassui ilinniartitaanermut nuunneqarnikuullutik, tulleriaarinerlu taanna ukiut ingerlanerini kiffartuussinermut isumaqatigiissutinik aallaavilimmik angallassinerit annikigisassaanngitsumik mangiarneqarsimasut.
– Aningaasat kiffartuussinissamut isumaqatigiissutinut atorneqartaraluartut ilinniartitaanermut aningaasaliissutinut nuunneqannginnerini, kiffartuussinissamut isumaqatigiissutinut 164 millioner koruunit atorneqartarsimagaluarput. Ullumikkut aningaasat nalingannut sanillersuutissagutsigu 216 millioner koruunit naligivaat, taamaattorli kiffartuussinissamut isumaqatigiissutini kingullerni Naalakkersuisut taamaallaat 121 millioner koruunit atugassarisimavaat ilaasunik angallassineq kiffartuussinissamik isumaqatigiissuteqarfimmiittunut atugassiissutigineqartut. Kisitsisit taakku tunngavigalugit, Danielsenip erseqqissarpaa, pingaaruteqarluinnartoq Inatsisartut aalajangersaaniarnerminni tulleriaarinerminnilu kiffartuussinissamut isumaqatigiissutit tunngavigalugit angallannermut atugassiissutiginiakkaminnut malussarniutiginnissaat, taamaalillunilu kiffartuussinissamut isumaqatigiissutit siunissami atuutilerumaartut pillugit arsaq Inatsisartunut tunniuppaa.
Allaaserisaq tamaat aviisimi Sermitsiami atuaruk. Uani ataani linki aqqutigalugu isissutissarsigit: