Karl Frederik Danielsen: Kangerlussuup aningaasatigut kingunerlutsitsisinnaaneranik takussutissaqanngilaq
Kangerlussuup ammaannartinneqarnissaa pillugu inuiaqatigiit aningaasaqarneranik misissuisoqarsimanngikkaluartoq, naalakkersuisoq isumaqarpoq mittarfissat nutaat imminnut akilersinnaassasut - inuinnaalluunniit Kangerlussuakkoorlutik angalasaraluarpata
Kangerlussuarmut suli timmisartortoqarsinnaangaluartorluunniit mittarfissat nutaat imminnut akilersinnaasssaput. Attaveqaatinut Naalakkersuisoq Karl Frederik Danielsen (S) taamatut naatsorsuuteqarpoq, taamatut naatsorsuuteqarnerminut ikorfartuisinnaasumik aningaasaqarnikkut misissuisimanermik peqanngikkaluarluni.
Mittarfissat akuerineqarnissaat sioqqullugu, inuiaqatigiit aningaasaqarnerannik misissuisimanermi, periarfissat marluinnaat, tassalu Kangerlussuup heliportinngortinneqarnissaa imaluunniit 1.500 meterisut takissuseqarnissaa atorlugit naatsorsuisoqarsimavoq. Tamatumani tunngavigineqarsimalluni, Kangerlussuarmik nutarterinissap kalaallinit akilerneqarnissaa.
Naatsorsuisoqarsimanngittoq
Maanna pisussaq, tassa Kangerlussuup mittarfissuartut ammatiinnarneqarnissaani, illersornissaqarfiup mittarfiup nutarterneqarneranut akiliisussanngornera natsorsorneqarsimanngilaq.
Tamanna tunngavigalugu Sermitsiaq.AG-p Karl Frederik Danielsen (S) apersorumasimavaa, maanna naatsorsuutaasut inuiaqatigiit aningaasaqarnerannut qanoq kinguneqarsinnaanerinik paasissutissiinissaa anguniarlugu.
- Mittarfiit nutaat sananeqarnissaat inuiaqatigiit aningaasaqarneranni iluanaarutaasussaasoq, inuiaqatigiit aningaasaqarnerannut kingunerisassanik naliliinermi inerniliissutigineqarpoq. Misissueqqissaarnermi Namminersorlutik Oqartussat Kangerlussuarmi mittarfimmut aningaasaliingaatsiartariaqarnissaat tunngavigineqarpoq. Maanna Illersornissaqarfiup siunissami Kangerlussuup mittarfianik atuinissaa pillugu Illersornissamut ministeriaqarfimmut tunngaviusunut isumaqatigiissuteqarpoq. Illersornissaqarfiup Kangerlussuup mittarfianut aningaasaliissutissaasa amerlassusissaat ukiup tulliata ingerlanerani paasinarsissapput, Karl Frederik Danielsen apersorneqarnissaminut piffissamik nassaarsinnaasimanngitsoq allakkatigut akissuteqarluni allappoq.
‘Takussutissat pitsaasut’
- Illersornissaqarfip Kangerlussuarmik atuinnarnissaata kinguneranik, mittarfissat aaqqissugaanerisa tamarmiusut inuiaqatigiit aningaasaqarnerisa kinguneqaatissaannik nalilersuisimanermut kingunerlutsitsisinnaaneranik takussutissaqanngilaq. Akerlianik mittarfissat nutaat imminnut akilersinnaanerat pitsaasunik takussutissaqarpoq - aamma Kangerlussuaq inuinnarnit angallaffiugaluarpalluunniit. Inatsisissamik piareersaalluni suliaqarsimanermut atatillugu, ilaasut angallattarnissaannik misissueqqissaarsimanikkut tamanna ikorfartorneqarpoq, naalakkersuisoq 'takussutissat pitsaasut' suunerinik itisileeqqinngakkaluarluni allappoq.
Aamma Kangerlussuaq heliportitut atuutissappat atuutissanngippalluunniit mittarfissat tamarmiusut akilersinnaanerussanersut isummerfiginngilaa.
Ilulissat sunnerneqarsinnaasut
Kalaallit Airportsimi siulitaasup Johannus Egholm Hansenip nassuiaatigaa, Kangerlussuup Nuummut annikitsuinnarmik sunniuteqarnissaa naatsorsuutigalugu.
- Akerlianik Kangerlussuaq pillugu isumaqatigiissut Ilulissani mittarfissap nutaap aningaasaqarneranut annertunerulaartumik sunniuteqarsinnaavoq, tassa timmisartortitseqatigiiffit timmisartuutiminnik takornarianik ilaasulinnik, Kangerlussuarmukartitseriarlutik Ilulissanut ingerlaqqittassappata, tusagassiorfinnut nalunaaruteqarnermini oqarpoq.
- Taamatulli angallassinemik aaqqissuussineq angalasartunit piumaneqarnavianngilaq, angalasartummi orniguffissaminnik toqqaagaangamik toqqaannaq timmisartukkut apuunnissartik pingaartilluinnartarmassuk, tamatumunngalu tunngatillugu takussutissaqanngilaq, taamatut sunniuteqarneq suliniutip aningaasalersorneqarneranut tamarmut ajoqutaasinnaanera.
Nutaamik misissueqqissartoqarniarnersoq pillugu apeqqut akineqanngilaq
Kalaallit Airportsimit maanna 'isumaqatigiissutip Nummi Ilulissanilu timmisartoqarfissat nutaat ilaasoqarnissamut tunngaviinut sunniutaasinnaasut eqqarsaatigalugit aningaasaqarnikkut kinguneqaataasinnaasunik pisariaqartinneqartumik naatsorsuisoqassaaq', ilanngullugu allappoq.
Sermitsiaq.AG-p Karl Frederik Danielsen aperisimavaa, inuiaqatigiit aningaasaqarnerannik misissueqqissaartoqaqqinniarnersoq. Apeqqut taanna akissuteqarfiginngilaa.
- Tullertut erseqqissassallugu uannut pingaaruteqarpoq, Kangerlussuup ingerlanneqarnera akisussaassusilimmik siunissami angallassinermik pisariaqartitsinermut naleqqussarneqarnissaa Naalakkersuisut aalajangiusimajuarmassuk. Taamatuttaaq sanaartornermut inatsimmut nassuiaatini allassimavoq, tamatuma paasiniaaffigineqarnissaanut kommuuni akuutinneqassasoq, naalakkersuisoq allappoq.