Skip to main content

Karina Møller saqqummersitseqqippoq

Kalaallip nipilersortartup qaammat kingulleq nuuteeqqaliani Simplify saqqummersippaa. Københavnimi Frigg Festivalimi maajip 16-ani tusarnaartitsissaaq

Nipilersortartoq Karina Møller nuuteeqqamik saqqummersitseqqammerpoq 'Simplify'-mik taaguutilimmik. Nuuteeraq Kristoffer Jul Reenberg suleqatigalugu pilersinneqarpoq. 

Karina Møller nunani assigiinngitsuni ilisimaneqarluarpoq, soorlu USA-mi, Canadami, Alaskami Nunatsinnilu. Pamyua peqatigalugu arlaleriarluni nuuteeraliortareerpoq.

Nunarsuaq suliffigalugu
Karina Møller Uummannami meeqqanut uaajeernermik sungiusartitsisarpoq nammineq kajumissutsiminik. Karina Møller Qaqortumi inuuvoq, Nuummi, Los Angelesimi, Alaskami najugaqartareerpoq, Københavnimilu maannakkut najugaqartuulluni. Pamyua peqatigalugu nunanut allanut angalaqataasareerpoq, tallimariarlu nuuteeralioqatigisareerlugit. Kisimiillunili nuuteeraliornini pillugu ernumasimalluni oqarpoq. 

- Uunga cd-liorneq allanit cd-liornerniit allaaneruvoq. Taallai nipilersuutaallu suliaraakka. Taamaammat inuit qanoq qisuariaateqarnissaat pissangassutigaara, Karina Møller oqarpoq.

Karina Møllerip ernini nukarleq Inuk Uummannameeqatigaa. Meerai erinniornissaminut taalliornissaminullu isumassarsititsisartut oqaatigaa. 

- Meeraqarluni eqqissisimanartuuvoq. Angalagaangama peqataajuaannarput. Inuuninni misigisakka aallaavigalugit erinniortarpunga, Karina Møller oqarpoq. 

Nipilersortartut ArkTjiks peqatigalugit ukioq kingulleq tusarnaartitseqattaarpoq. 

Eqqissisimasumik inuuneq
Saqqummersitaani 'Simplify' qulequtaritinneqarpoq. Tassani inuuneq atoraanni nuannersigaluttuinnartartoq oqariartuutigineqarpoq. Erinnat arlaqartut asanninnermut attuumassuteqarput. Taallaq 'Inuk' ernerminut attuumassuteqartippaa, tassani inoqqaariit Inuit nukittuut aamma sammineqarput. Alaskami arnat nukittuut pillugit 'Strong native women' aamma sanavaa. Canadarmiu ilisimaneqartoq Sylvia Cloutier tassani suleqatigaa. 

Saqqummersitami taallat tamarmik tuluttuujupput, tassani nipilersoriaatsit pop, jazz aamm funk tusaaneqarsinnaapput, kiisalu aamma inoqqaariit inuit sunniuteqaqataallutik. 

Saqqummersitaq Københavnimi suliarineqarpoq. Tassani Philip Blanchett, rappertartoq Allison Warden aamma nipilersoqataapput. Saqqummersitaq sumi tamaani pisiarineqarsinnaassaa, soorlu Nunatsinni, Danmarkimi, USA-mi aamma nittartakkakkut Itunes.com-ikkut.

Københavnimi Frigg Festivalimi Karina Møller maajip 16-ani tusarnaartitsissaaq. Karina Møller saniatigut Ortu Mørch Olsen (DJ T41) aamma Simon Lynge  tusarnaartitsissapput. Islandermiut Savalimmiormiullu aamma nipilersornermik festivalimi tusarnaartitsissapput.

Assit ataani takukkit

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER