Kapisillit pillugit aqutsinissamut pilersaarut siulleq naammassineqartoq
Kapisilinniartarnermi siullermerluni aqutsinissamut pilersaaruteqartoqalerpoq.
Naalakkersuisut kapisilinniarneq pillugu aqutsinissamik pilersaarut akuersissutigaat 30 tonsinillu pisassiissuteqarlutik.
Aalisarneq pillugu Siunnersuisoqatigiit Naalakkersuisunut innersuussutigisimasaat malillugit, pilersaarut suleqatigiissitanit 2020-mili suliarineqarsimasoq naapertorlugu kapisilinniarnissamut malittarisassat nutaat atuutsinneqalerput.
Suleqatigiissitat
- Aqutsinissamik pilersaarummi maanna aqutsinissamik pilersaarutaareersuni suliaasut, soorlu akuersissutinut piumasaqaatit, nalunaaruteqartussaatitaaneq, aamma pisaqarsimannginnermik nalunaartussaatitaaneq ilanngullugu kiisalu ukiup siuliani piffissaq eqqorlugu nalunaaruteqarsimanngikkaanni akuersissummik pisinnaannginneq kiisalu qassutinik tissukartittakkatinik atuinissamut inerteqqutit atuutsinneqaannassapput, aalisarnermut naalakkersuisoqarfimmit ilisimatitsissutigineqarpoq.
Pilersaarummi suliniutit nutaat
- Kalaallit Nunaata aqutsiveqarfinnut pingasunut agguataarneqarnera; Avannaanut, Kujataanut aamma Kalaallit Nunaata kangianut
- Aqutsinissamik pilersaarummi agguaasseriaaseq malillugu aqutsiveqarfiit tamarmik pisassiissutinit pisassinneqassapput
- Aqutsivinni tamani pisassiissutit inuussutissarsiutigalugu aalisartunut sunngiffimmilu aalisartunut agguaanneqartassapput
- Aqutsiveqarfiit tamarmik immikkut piffissamik aalisarfissinneqarput. Naalakkersuisut KNAPK isumasioqatigereerlugu aqutsiveqarfinnut ataasiakkaanut aalisarnissamut ullut aallartittarfissai aalajangersassavaat
- Inuussutissarsiutigalugu aalisartut amerlanerpaamik qassutit 20-t atorlugit aalisarsinnaapput
- Pisaqarsimanngikkaluaraanniluunniit aqutsiveqarfiup attuumassuteqarfigisap matuneqarneraniit kingusinnerpaamik ullut 14-t qaangiunneranni nalunaarutigineqassapput
- Kapisillit kuuanni aalisarniaraanni tassunga akuersissummik peqaqqaartariaqarpoq.