Kapisilinni tammaarsimaartarfik akimasoq

Tammaarsimaartarfiit glamping-imik taaneqartartut nunarsuarmi nuannarineqaleraluttuinnarput. Maanna aamma Nuup Kangerluani glamping misigineqarsinnaalerpoq.

Aggustimi septembarimilu arsarneqalertarnerani tupermi sininneq misigisassaavoq immikkut illluinnartoq, Ittu Hviid isumaqarpoq.

Nuummi niuertarfiutilik Stefan Ittu Hviid, Kapisillit eqqaanni illuaqqanik nuannaariartarfinnik ingerlatsivoq, Asimiut Tours and Camping-imik atilimmik. Maanna illuaqqat toqqinik glamping-imik taaneqartartunik ilavai, ilorrisimaarnangaaramik inuulluarnangaaramillu soorlu akunnittarfimmi najugaqarluni.

Aviisi Sermitsiaq taama allappoq.

Ittu Hviid-ip Asimut Tours and Camping 2107-imi Paula aamma Poul Krohn-ikkunnit pisiaraa, ineriartortileruttoraalu 2020-imi corona atuutilerpoq, takornarialerisunut akisoqisumik.

– Anguniakkatsinnut tulluarsaaleruttorluta neqeroorutillu piareersaleruttorlugit corona takkuppoq, suullu tamaasa unitsillugit. Tamanna aningaasarpaalunnik akeqarpoq, siunissarli qaamasoqarpoq, taamaattumik ingerlaqqissaagut, Stefan Ittu Hviid Sermitsiamut oqarpoq.

Illuaraatini pingasut amerlinissaat isumaliutigisimagaluarpaa, massakkorpiarli akissaqartissimanagu. Taamaattumik Ittu Hviid-ip kalaaleq aallartitseqataasartoq Jørgen Peter Poulsen, Fynimi Svendborgimi najugalik, suleqatigilersimavaa.

Aningaaserivimmiutut ilinniagaqarsimasup Poulsenip ernini peqatigalugu ingerlatsivik Lotus Belle Nordic ingerlataraa, nunani avannarlerni, pingaartumik Sverigemi, Norgemi Islandimilu, tuluit tupiliaanik Lotus Belle-nik tuniniaasartoq.

Aviisimi Sermitsiami allaaserisaq tamaat atuarsinnaavat:

Powered by Labrador CMS