Kapisilinni pitsassuarnik illuararpassualiortoqarniartoq
Kommuneqarfik Sermersuumi kommunalbestyrelsip, nunaqarfimmi Kapisilinni illuaqqat 50-it kiisalu kiffartuussiveqarfiit aamma qullersaqarfik neriniartarfittalik/imerniartarfittalik aamma allaffittalik sanaartorneqarnissaat pillugu qinnuteqaat sisamanngormat akuerisimavaat.
Takornariartitsinermik suliffeqarfik World of Greenland, ”Nuuk Icefiord Lodge” pilersinniarlugu pilersaaruteqarpoq. Suliffeqarfik maannamut Ilulissani taamatut ingerlatsisimavoq, siornalu 2,4 millioner koruuninik sinneqartooruteqarsimalluni.
Illoqarfiit pingaarnersaata kommuniani komunalbestyrelsip qinnuteqaat matoqqasumik suliarisimavaa, partiillu tamarmiullutik pilersarutinut, misigisassarsiorlutik takornariartartunut akigititat qanoq innerannik eqqarsaateqartanngitsunut pilerisutsitsilersinnaasut, Nuummi periarfissanik pitsaanerulersitsisussat akuersaarsimavaat.
World of Greenland Ilulissat Travel A/S-imit Kalaallillu Nunaata Angalatitsivianit igineqarpoq, World of Greenland Ilulissat Travel A/S Topas Explorer Groupimut immikkoortortaavoq aamma Grønlands Rejsebureau Air Greenlandimut immikoortortaavoq.
Illuaqqat Nuup Kangerluanut isiikkiveqartussat qaqqaq kaajallallugu inissisimasussaapput, 2023-milu Nuummi timmisartoqarfissarsuaq nutaaq piareersimalerpat, ukiup naanerani illuaqqat atorneqarnissamut piareersimassasut naatsorsuutigineqarluni.
World of Greenland Qeqertarsuup Tunuani pinngortitami kusanaqisumi illuaqqanik aqutsinermik misilittagaqarluarpoq, ilaatigullu ingerlataralugit Ilimanaq Lodge, Glacier Lodge Eqi aamma Iglo Lodge. Illuaqqallu taakku tunngaviusimapput, illuaqqanik 40-nik 36 kvm-isut angitigisunik, 9 kvm-inillu angissusilinnik salliarnartalinnik sanaartornissamik isumassarsisimanermut. Aamma illuaqqat qulit 41 kvm-isut angitigisunik naluttarfittallit salliarnartaannilu 14 kvm-isut angitigisumik naluttarfittallit sanaartorneqassapput.
- Illutassaat tamarmik atortut avatangiisinut nungullarsaataanngitsut atorlugit sananeqarssapput, tassa qisuunerusut atorneqassapput, sallilikkat suliarineqanngitsut atorneqassallutik, aamma seqerngup nukinganik innaallagialersugaasapput. Illuaqqat ataasiakkaat akornanni aaqqissuussaasumik ikaartarfeqartitsissaaq, isumannaallisaaneq eqqarsaatigalugu LED-iusunik qullilersukkanik, najukkami politkkerinut suliamik saqqummiussissummi atuarneqarsinnavoq.
Issumik illuliat aallaavigalugit illuaqqat ilusilersorneqarsimasut
- Illuaqqanut assartuineq pisassaaq sukkasuuliat Targat Nuummiit assartuitittarnerisigut, talinnermiit illuaqqanut ATV innaallagiartortut qamuteralaallu atorneqartassapput, immikkullu ittumik pisortartillugu qulimiguullit atorneqarsinnaassallutik. Najukkami umiatsianik attartortitsisartut tikeraanik angallassisartussatut isumaqatigiissuteqarfigineqarsimapput, nalunaaruteqarnermi ilisimatitsissutigineqarpoq.
World of Greenlandip qinnuteqataanut atatillugu pingaartinneqarsimavoq, avatangiisit eqqarsaatigalugit sanaartortoqarniarnera, aamma Kapisillit eqqaaniittumi Kngersunermi ukioq naallugu tammaariartarfimmik pitsassuarmik pilersitsisoqarniarnera.
- Illuaqqat ilusilersorneqarneranni kalaallit qanga issumik illulioriaasiat aallaavigineqarsimavoq, kangeluulli tungaanut igalaarujussuaq aqqutigalugu isikkiveqassallutik. Illuaqqat akornanni ilummut takusaqariaannaasoqannginnissaa anguniarlugu, illuaqqat pinngortitap kusanartorsuup tungaanut sammitinneqassapput, polikkerinut inassuteqaammi nassuiaatigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...